Kievi u zgjua mes shpërthimeve të forta këtë të hënë, teksa Rusia lëshoi breshëri raketash që shkaktuan zjarre, dëmtuan banesa dhe infrastrukturë.
Shpërthime të njëpasnjëshme dhe zhuma e raketave të sistemeve të mbrojtjes ajrore që u lëshuan drejt qiellit për të interceptuar objektivët tronditën qytetarët në ditën e parë të vitit shkollor, siç raporton A2.
Forcat e mbrojtjes ajrore thanë se kishin shkatërruar 22 nga 35 raketat dhe 20 prej 23 dronëve të sulmit. Polonia fqinje, anëtare e NATO, aktivizoi avionët polakë dhe të aleatëve për të mbrojtur hapësirën ajrore gjatë sulmeve. Hyrja në një stacion metroje, e cila shërben edhe si vendstrehim, u dëmtua në distriktin e Svyatoshynksyi. Në zonë gjenden një sërë shkollash e universitetesh.
Yulia Khymenko u shpreh: “Mendoj se e bënë qëllimisht. Aty gjendet një kompleks universitar dhe të gjithë e dinin se studentët rikthehen nëpër klasa. Kjo është diçka e paligjshme”.
3 persona mbetën të plagosur sipas autoriteteve ushtarake në Kiev, 2 prej të cilëve u dërguan në spital. Një sërë automjetesh rreth qytetit morën flakë me shërbimet e emergjencës që mbërritën në një sërë zonash, përfshirë ato të Svyatoshynskyi, Solomyanskyi ku mbetje raketash ranë mbi objekte.
Prej disa ditësh, Moska ka intensifikuar sulmet kundër Ukrainës, në kundërpërgjigje të inkursionit në Kursk. Në një deklaratë, Presidenti rus Vladimir Putin tha se inkursioni nuk e kishte penguar ushtrinë ruse të avanconte në lindje të Ukrainës. Putin u zotua se do të merreshin me banditët që kishin depërtuar në Federatën Ruse dhe se operacioni do të dështonte.
(A2 Televizion)
A2 CNN Livestream
MUND TE LEXONI GJITHASHTU
