Presidenti amerikan Donald Trump po punon për të shkurtuar 5 miliardë dollarë ndihmë të huaj, edhe pse fondet ishin miratuar më herët nga Kongresi.
Sipas mediave të huaja, vendimi u shpall nga Zyra e Menaxhimit dhe Buxhetit e Shtëpisë së Bardhë dhe përdor një mekanizëm të rrallë, të quajtur “pocket rescission”, që lejon presidentin të kërkojë anulimin e fondeve nëse Kongresi nuk reagon deri më 30 shtator, kur mbyllet viti fiskal.
Kjo lëvizje nuk është parë prej afro gjysmë shekulli, që nga koha e ish-presidentit Jimmy Carter në vitin 1977, shkruan A2 CNN.
Shkurtimet kryesore përfshijnë:
3 miliardë dollarë për USAID,
900 milionë dollarë fonde të Departamentit të Shtetit,
800 milionë dollarë për misionet paqeruajtëse,
300 milionë dollarë për programe që mbështesin demokracinë jashtë vendit.
Shtëpia e Bardhë deklaroi se Trump po synon të “vërë në rregull shtëpinë fiskale të Amerikës, duke prerë shpenzimet që janë të kota, të politizuara dhe të panevojshme”.
Por reagimet nuk munguan: senatorja republikane Susan Collins e cilësoi veprimin si “shkelje të qartë të ligjit”, ndërsa lideri demokrat Chuck Schumer paralajmëroi se manovra mund të çojë deri në një “mbyllje të panevojshme të qeverisë”.
Që kur është rikthyer në detyrë, Trump ka reduktuar ndjeshëm ndihmën e huaj, duke e kufizuar rolin e USAID, të cilën e konsideron një instrument të mbushur me shpenzime të panevojshme. (A2 Televizion)
A2 CNN Livestream
MUND TE LEXONI GJITHASHTU
