Bombardime të reja izraelite, goditën Gazën dhe Libanin këtë fundjavë, duke shkaktuar të paktën 100 viktima.
Mbi 73 vetë u vranë në qytetin e Beit Lahia në veri të Gazës, dhe dhjetëra të tjerë u plagosën. Sipas autoriteteve shumë vetë kanë mbetur të bllokuar nën rrënojat e godinave të shembura si pasojë e bombardimeve mbrëmjen e së shtunës.
Izraeli thotë se po verifikon raportet për viktima dhe akuzoi Hamasin se po shpërndan informacione të ekzagjeruara që siç pretendon, nuk përputhen me të dhënat e ushtrisë.
Luftimet vijojnë të ethshme edhe në Liban ku Izraeli ndërmori një tjetër valë sulmesh ajrore në periferinë jugore të Bejrutit. Banorëve në dy lagje ju kërkua të largoheshin nga shtëpitë e tyre.
Izraeli deklaron se forcat e IDF kishin shënjestruar rreth 175 objektiva të terroristëve në Gaza dhe Liban përgjatë 24 orëve të fundit.
Forcat e mbrojtjes thanë se kishin goditur selinë e shërbimeve të inteligjencës në Bejrut, dhe se kishin vrarë komandantin e frontit jugor të Hezbollah Abbas Salama dhe dy eksponentë të tjerë të rëndësishëm të grupit, shkruan A2.
Gjatë së shtunës një dron u lëshua kundër shtëpisë së pushimit të Netanjahut, me këtë të fundit që akuzoi menjëherë Iranin. “Do ta paguajnë shtrenjtë”, u zotua kryeministri izraelit që e cilësoi aktin një gabim të madh.
Por Teherani mohon, dhe thotë se nuk kishte pasur rol në sulm. Ndërkohë, burime të afërta me ekzekutivin izraelit thonë se po diskutohet mundësia e përdorimit të trupit të liderit të vrarë të Hamas, Jahja Sinwar, si mall shkëmbimi për lirimin e pengjeve. (A2 Televizion)
A2 CNN Livestream
MUND TE LEXONI GJITHASHTU
