Deputetët e Partisë Demokratike dhe të Aleancës hynë sot në kuvend, ku kërkuan rifillimin sa më parë të seancës konstituive. Ata u ulën në vendet e tyre dhe kryetari i PDK-së, Bedri Hamza, lëshoi akuza të forta në drejtim të kryesuesit të seancës, Avni Dehari, si dhe kreut të Vetëvendosjes.
“Albin Kurti po e mban peng shtetin e Kosovës. Pa e rikthyer rendin kushtetues, me ne nuk mund të flitet për asgjë tjetër”, u shpreh ai në foltore.
Më i ashpër në fjalët e tij ishte deputeti i Aleancës, Burim Ramadani, që e akuzoi Kurtin për rrezikim të sigurisë kombëtare.
“Vakumi institucional është baza e rrezikimit të sigurisë kombëtare. Pse po ikin këta njerëz? Pse kanë qëllim bllokimin e institucioneve dhe shtetit?”, pyeti deputeti i Aleancës.
Kryeministri në detyrë komentoi zhvillimet e fundit dhe thirrjet e partive PDK, LDK dhe Aleanca, duke përsëritur qëndrimin e tij se duket një marrëveshje për presidentin dhe më pas të thirret rifillimi i seancës.
“Qëndrimi i Vetëvendosjes si fituese e zgjedhjeve është që presidenti i ardhshëm të jetë konsensual me mbështetje sa më të gjerë në Kuvend dhe në popull, të jetë personalitet që ka merita dhe kontribut, vlera kombëtare qytetare, por gjithashtu edhe i dëshmuar në profesion e shoqëri dhe për këtë dëshirojmë të merremi vesh në mënyrë që të evitojmë zgjedhjet e reja”, tha Kurti.
Megjithatë kjo përgjigje irritoi dhe më shumë kreun e PDK-së, që lëshoi këtë deklaratë në hollin e kuvendit. (A2 Televizion)
A2 CNN Livestream
MUND TE LEXONI GJITHASHTU
