Hija e zgjedhjeve të parakohshme parlamentare vazhdon që të përndjekë Kosovën. Pavarësisht konsolidimit të mazhorancës së kryesuar nga Lëvizja Vetëvendosje, çështja e presidentit është ajo që mund të rrëzojë balancat. Partia Demokratike e Kosovës dhe Lidhja Demokratike e Kosovës janë në pritje të ftesës së liderit të partisë në pushtet, njëherësh kryeministrit të vendit, Albin Kurti, për nisjen e konsultimeve.
Artan Behrami, deputet i PDK, u shpreh:
“Partia Demokratike e Kosovës e ka bërë të qartë, qëndrimi ynë është i qartë, që për president duhet të ketë marrëveshje politike, duhet të ketë konsensus politik, duhet të ketë dialog dhe kompromis, i cili duhet të nxjerrë një president apo presidente që është përfytyrim dhe personifikim i unifikimit të popullit të Kosovës… Edhe më tutje nuk ka kandidaturë që ka ardhur nga partitë politike që kanë fituar në Parlamentin e Republikës së Kosovës.”
Armend Zemaj, deputet i LDK, tha:
“Nuk është që është biseduar nëse do të kemi kandidat. Ajo çka është e ditur dhe e njohur, kemi potencial, gjithmonë kemi pasur potencial që të kemi njerëz që janë shembull në udhëheqje dhe lidership, qoftë president, kryeministër apo pozita të tjera.”
Ndërkohë, politologu Melazim Koci vlerëson se vonesa në nisjen e konsultimeve mund të reflektojë në vështirësi gjatë procesit.
Politologu Melazim Koci thotë:
“Këtu shoh probleme dhe nuk e përjashtoj mundësinë që Kosova, pas konstituimit të Kuvendit dhe themelimit të Qeverisë, miratimit të buxhetit dhe marrëveshjeve ndërkombëtare për liferim të mjeteve nga BE-ja, të ketë probleme tek zgjedhja e presidentit apo presidentes dhe nuk e përjashtoj mundësinë që edhe të shkohet në zgjedhje të tjera të jashtëzakonshme nga mesi i prillit… Për momentin ne nuk kemi një emër, pos kandidaturës së Osmanit, e cila nuk ka ndonjë mbështetje në këtë rast të forcave politike, së paku publike, madje as të Vetëvendosjes, sepse nuk ka deklarim të VV-së as pro as kundër.”
Pavarësisht se kreu i Vetëvendosjes kishte paralajmëruar nisjen e konsultimeve me partitë parlamentare për zgjedhjen e presidentit apo presidentes së re, ende nuk ka diçka konkrete. Partia e Kurtit ka pushtetin në Kosovë, me një mazhorancë me 66 deputetë në Kuvend.
Presidentja Vjosa Osmani ka mandat deri më 4 prill 2026, mirëpo sipas Kushtetutës zgjedhja e presidentit duhet të bëhet një muaj para përfundimit të mandatit, në këtë rast më 4 mars. Në të kundërtën, vendi duhet të shkojë në zgjedhje të parakohshme.
Deri më tani, presidentja Osmani është e vetmja që ka shfaqur ambicie për të rikandiduar edhe për një mandat tjetër pesëvjeçar. Megjithatë ajo nuk ka siguruar ende 30 nënshkrime të deputetëve për të zyrtarizuar kandidaturën e saj. (A2 Televizion)
A2 CNN Livestream
MUND TE LEXONI GJITHASHTU
