Këshilli i Bashkimit Europian ka miratuar masën e dytë të ndihmës në mbështetje të Task Forcës Mjekësore Ballkanike me vlerë 10 milionë euro. Sipas njoftimit të BE-së ky fond ka për qëllim forcimin e aftësive operacionale dhe gatishmërisë së Task Forcës Mjekësore Ballkanike (BMTF).
BMTF bashkon aftësitë mjekësore ushtarake të partnerëve rajonalë për të ofruar mbështetje mjekësore ushtarake për operacionet ndërkombëtare. Masa e ndihmës e Fondit Evropian për Paqen do të forcojë gjithashtu kapacitetin e BMTF-së për të mbrojtur popullsinë civile në rast të fatkeqësive natyrore ose të shkaktuara nga njeriu.
BMTF tashmë merr pjesë në ushtrime ushtarake për të trajnuar personelin e saj dhe për të forcuar gatishmërinë dhe ndërveprimin e saj operacional, dhe është një shembull i prekshëm i bashkëpunimit rajonal në sferën e mbrojtjes.
Sipas njoftimit të Këhsillit të Europës, ky vendim nënvizon angazhimin e vazhdueshëm të BE-së dhe Shteteve Anëtare me partnerët e Ballkanit Perëndimor për sigurinë dhe mbrojtjen.
“Duke forcuar mbështetjen nga Fondi Evropian i Paqes për Task Forcën dhe rajonin, ai pasqyron vendosmërinë tonë të përbashkët për të rritur sigurinë, stabilitetin dhe qëndrueshmërinë rajonale . BMTF dhe forcat e armatosura të partnerëve kontribues do të marrin pajisje për spitalet fushore, automjete mjekësore ushtarake dhe sisteme komunikimi dhe informacioni, dhe, kur është e nevojshme, furnizime dhe shërbime përkatëse, duke përfshirë trajnimin teknik” thuhet në njoftim.
Ky veprim i ri e çon mbështetjen e përgjithshme të BE-së për BMTF-në në 16 milionë euro në kuadër të Mekanizmit Evropian të Paqes.
Fondi Evropian i Paqes u krijua në mars të vitit 2021 për financimin e veprimeve në kuadër të politikës së përbashkët të jashtme dhe të sigurisë për të parandaluar konfliktet, për të ruajtur paqen dhe për të forcuar sigurinë dhe stabilitetin ndërkombëtar. Në veçanti, EPF-ja i lejon BE-së të financojë veprime të hartuara për të forcuar kapacitetet e shteteve të treta dhe organizatave rajonale dhe ndërkombëtare që lidhen me çështjet ushtarake dhe të mbrojtjes. (A2 Televizion)
A2 CNN Livestream
MUND TE LEXONI GJITHASHTU
