Vrasja e 29-vjeçarit Ermir Dedja në një lagje periferike të Durrësit ka angazhuar të paktën katër persona. Të paktën këto janë të dhënat e hetimit të Policisë së Durrësit, sipas të cilës janë identifikuar dhe shpallur në kërkim dy persona.
Ata mendohet se kanë ndihmuar dhe krijuar kushtet e nevojshme për ekzekutimin e 29-vjecarit, shkruan A2.
Më konkretisht, dy të shpallurit në kërkim kanë siguruar automjetin dhe kanë bashkëpunuar ngushtë për realizimin e ekzekutimit të Dedjas. Gjithnjë sipas të dhënave hetimore të Policisë së Durrësit, përveç dy personave në rolet e bashkëpunëtorëve, në rolin e autorëve të vrasjes mendohet se kanë qenë dy persona të tjerë, për identitetin e të cilëve policia nuk jep detaje për momentin.
Sakaq, mjeti i gjetur i djegur në fshatin Gërdec, së bashku me armën automatike, edhe pse të djegur, janë dërguar për ekazaminime në laboratorin e kriminalistikës.
Sa i takon motiveve të këtij atentati të mirëorganizuar, policia dyshon se e kaluara dhe përfshirja e viktimës në disa aktivitete të paligjshme, ngre dyshime për disa pista hetimore, por që deri më tani nuk ka ndonjë pistë zyrtare. (A2 Televizion)
A2 CNN Livestream
MUND TE LEXONI GJITHASHTU
