Nisi në Prishtinë Sunny Hill Festival. Mijëra adhurues të muzikës nga Kosova dhe vende të tjera vërshuan drejt Bërnicës, zonës ku po mbahet eventi i përvitshëm në kryeqytetin e Kosovës.
Sipas KosovaPress, interesimi i madh ka krijuar kolona të gjata automjetesh në rrugët që çojnë drejt hapësirës së festivalit.
Kulmi i natës së parë ishte performanca e superyllit botëror Katy Perry, e cila u ngjit në skenën kryesore rreth orës 22:30 dhe dhuroi një spektakël të shoqëruar me efekte vizuale, koreografi dhe kostume me tematikë hapësinore.
Artistja amerikane u shfaq e veshur si astronaute, ndërsa akrobatët në skenë i dorëzuan flamurin e Kosovës, një moment që u prit me entuziazëm nga publiku dhe u bë një nga skenat më të komentuara të mbrëmjes.
“Përshëndetje Prishtinë! A do të festoni me mua?”, ishte përshëndetja e parë e Katy Perryt për mijëra të pranishmit, të cilët kënduan në kor hitet e saj gjatë gjithë koncertit.
Katy Perry valëviti flamurin e Kosovës në skenën e shndërruar në hënë.
Një tjetër moment i veçantë ishte takimi me Erën. Vajza 10-vjeçare realizoi ëndrrën e saj duke kënduar me yllin botëror Katy Perry.
Para performancës së saj, atmosferën e ndezi këngëtarja shqiptare Dhurata Dora, ndërsa festivali i organizuar nga Dua Lipa do të vazhdojë edhe gjatë fundjavës me performanca të artistëve të njohur ndërkombëtarë, përfshirë Lewis Capaldi dhe Martin Garrix.
(A2 Televizion)
A2 CNN Livestream
MUND TE LEXONI GJITHASHTU
