Politologu Afrim Krasniqi është përplasur në debat me deputetin e Partisë Socialiste, Eduard Shalsi, lidhur me protestat e dhunshme dhe situatën politike në vend.
I ftuar në emisionin "Off the Record" nga Andrea Danglli në A2CNN, Krasniqi argumentoi se kriza nuk ka nisur ditët e fundit, por prej muajsh, që prej protestave masive të flamingove, ndërsa kritikoi reagimin e qeverisë ndaj protestuesve dhe paralajmëroi se zhvillimet e fundit ishin të pritshme.
“Problemi s’ka nisur 8 ditë përpara, problemi ka nisur 4 muaj përpara. Qytetarët e Tiranës kanë bërë nga protestat më masive të tranzicionit shqiptar, kundër gjithë politikës dhe establishmentit politik dhe i kanë artikuluar kërkesat e tyre në atë kohë”, u shpreh Krasniqi.
Ai iu drejtua Shalsit duke thënë se reagimet e përfaqësuesve të mazhorancës tregojnë shkëputjen e tyre nga realiteti.
“Reagimi ka qenë i ashpër kundër një establishmenti që ka humbur lidhjen me realitetin dhe, me gjithë respektin për z. Shalsi, unë besoj që ajo që ai tha është tregues që e kanë humbur lidhjen me realitetin”, deklaroi politologu.
Krasniqi tha gjithashtu se qeveria ishte paralajmëruar për protestat e studentëve në shtator, por, sipas tij, në vend që të gjente zgjidhje për kërkesat e tyre, kryeministri Edi Rama zgjodhi një gjuhë intimidimi dhe fyerjesh.
“Ne të gjithë e kemi thënë që do vijnë studentët në shtator dhe duhet të keni një zgjidhje për ta. Kryeministri filloi t’i intimidojë, t’i bullizojë, i fyeu, i quajti agjentë të huaj. Kjo lloj situate s’mund të kishte fund tjetër përveç këtij fundi”, përfundoi Krasniqi. (A2 Televizion)
A2 CNN Livestream
MUND TE LEXONI GJITHASHTU
