Demokratët shkuan në Parlament me qëllimin për të penguar çdo nuancë normaliteti.
Ndërkohë, Flamur Noka kishte nisur t’u hiqte socialistëve kartat e prezencës dhe të votimit, por kur mbërriti te Taulant Balla, situata përfundoi në përleshje.
Ndërsa demokratët qëndronin të gjithë në këmbë, Sali Berisha qëndronte ulur në vendin e tij. Ai e ndiqte situatën nga distanca dhe direktivat i përcillte përmes deputetes Denisa Vata.
Kreu i grupit parlamentar të PS-së e lexoi situatën dhe kërkoi menjëherë kalimin në votim të rendit të ditës.
Situatën e ndezi edhe më shumë përpjekja e demokratëve për t’u marrë socialistëve kartat e votimit, ndërkohë që sistemi i votimit elektronik kishte dalë jashtë funksionit.
Nga ofendimet te konfrontimi fizik, hapi ishte i shkurtër. Përplasja nisi fillimisht mes deputetit demokrat Fidel Kreka dhe socialistit Ervin Hoxha, ndërsa më pas u përfshinë edhe deputetë të tjerë.
Tensioni i krijuar e detyroi Sali Berishën të ngrihej në këmbë dhe t’u kërkonte deputetëve të tij të tërhiqeshin drejt foltores. Këmbëngulja e kryedemokratit shmangu përshkallëzimin e mëtejshëm dhe situata u qetësua pas përfundimit të votimit të rendit të ditës.
Jashtë, në oborrin e Parlamentit, përplasja vijoi në distancë, por këtë herë vetëm me fjalë.
“Ky sistem duhet të marrë fund.”, tha Berisha.
“E patë kush është porositësi i dhunës?”, tha Balla.
Kryedemokrati doli hapur në mbështetje të protestës, duke marrë përsipër jo vetëm përkrahjen, por edhe autorësinë e saj.
Ndërsa socialistët u bëjnë thirrje kundërshtarëve të tyre politikë që forcën ta matin në zgjedhje.
Demokratët paralajmëruan se do të ndjekin të njëjtën strategji edhe në seancat e ardhshme, ndërsa PS-ja deklaron se nuk do të ketë më vonesa në miratimin e ligjeve që lidhen me integrimin. (A2 Televizion)
A2 CNN Livestream
MUND TE LEXONI GJITHASHTU
