Kryeministri Edi Rama konfirmoi se do të zhvillojë në fund të marsit dy takime me shqiptarët e Greqisë. Ashtu siç A2 CNN raportoi që më 18 mars, Rama do të jetë në Kretë më 29 mars, ndërsa më 30 mars në Athinë.
“Shihemi më 29 mars në Kretë, 30 mars në Athinë”, tha Rama në një video të publikuar në rrjetet sociale.
Në këto dy takime, Rama do të shoqërohet edhe nga drejtuesi politik për Diasporën në PS, Taulant Balla.
Gjatë muajve të fundit, kryeministri ka ndërmarrë një tur takimesh me diasporën shqiptare në disa vende evropiane. Më 12 maj 2024, ai nisi këtë tur në Athinë, ku u prit nga mijëra shqiptarë në sallën "Christmas Theater" në stadiumin 'Galatsi'. Në fjalimin e tij, Rama theksoi rëndësinë e forcimit të marrëdhënieve mes Shqipërisë dhe Greqisë, duke bërë thirrje për një histori të re bashkëpunimi.
Më pas, më 26 maj 2024, kryeministri zhvilloi një takim në Milano, Itali, në pallatin e sportit në Busto Arsizio, ku morën pjesë emigrantë shqiptarë nga qytete të ndryshme të Italisë. Gjatë këtij takimi, Rama diskutoi për përfshirjen e diasporës në proceset vendimmarrëse në Shqipëri dhe mundësinë e votimit nga jashtë.
Në vijim, më 2 qershor 2024, ishte planifikuar një takim në Londër, por ai u anulua. Po ashtu, takimi i parashikuar në Gjermani më 16 qershor 2024 u anulua për shkak të zhvillimit të Kampionatit Evropian të Futbollit, duke e bërë të pamundur organizimin e një eventi të tillë.
Gjatë këtyre takimeve, Rama njoftoi se shqiptarët që jetojnë jashtë vendit do të kenë mundësinë të votojnë me postë në zgjedhjet parlamentare të pranverës 2025. Ai theksoi rëndësinë e angazhimit të diasporës në proceset demokratike të vendit dhe rolin e tyre në zhvillimin e Shqipërisë. (A2 Televizion)
A2 CNN Livestream
MUND TE LEXONI GJITHASHTU
