Kryeministri Edi Rama, ka reaguar në rrjetet sociale pas sulmeve të Iranit ndaj Emirateve të Bashkuara Arabe. Në një postim në X, kreu i qeverisë shqiptare i cilëson ato si një kërcënim serioz jo vetëm për një shtet sovran, por për stabilitetin dhe paqen në të gjithë Lindjen e Mesme.
Sipas kreut të qeverisë shqiptare, sulmet me raketa ndaj Dubait, të cilin e përshkroi si një “oaz paqeje”, tregojnë natyrën e një regjimi që, sipas tij, eksporton dhunë dhe terror për të frikësuar fqinjët dhe vetë popullin e tij. Ai e quajti këtë një refleks të një sistemi të destinuar të dështojë.
Rama theksoi se Shqipëria qëndron në solidaritet të plotë me udhëheqjen dhe popullin e Emirateve, ndërsa i bëri thirrje komunitetit ndërkombëtar të reagojë me unitet kundër agresionit dhe destabilizimit në Gjirin Persik.
Ai i bëri thirrje komunitetit ndërkombëtar të flasë me qartësi dhe unitet kundër agresionit shtetëror dhe sulmeve me raketa ndaj zonave civile.
Postimi i kryeministri Edi Rama në platformën X
Sulmet e verbra dhe të dëshpëruara të Republikës Khomeiniste kundër Emirateve të Bashkuara Arabe nuk janë thjesht një sulm ndaj një kombi sovran. Ato janë një sulm ndaj stabilitetit, prosperitetit dhe vetë idesë se Lindja e Mesme mund të përcaktohet nga paqja dhe bashkëpunimi, e jo nga lufta dhe kaosi.
Shënjestrimi i një oazi paqësor si Dubai me raketa urrejtjeje dhe shkatërrimi zbulon edhe një herë natyrën e vërtetë të regjimit mesjetar në Teheran. Ky është refleksi i një sistemi të destinuar të dështojë, një sistemi që eksporton dhunë dhe përdor terrorin si armë kundër fqinjëve që kërkojnë paqe, për t’i frikësuar jo vetëm ata, por para së gjithash popullin e vet që kërkon liri.
Emiratet e Bashkuara Arabe janë bërë një simbol global i promovimit të paqes, hapjes ndaj dialogut, dinamizmit ekonomik, bashkëjetesës ndërfetare dhe vitalitetit kulturor. Ato përfaqësojnë një model se si mund të duket një Lindje e Mesme moderne: e sigurt në vetvete, e ndërlidhur, me vizion përpara dhe thjesht e bukur. Të godasësh verbërisht kundër saj do të thotë të godasësh vetë mundësinë e një rajoni që ka zgjedhur zhvillimin mbi shkatërrimin, bashkëpunimin mbi përballjen, paqen mbi luftën.
Shqipëria qëndron në solidaritet të plotë dhe të palëkundur me udhëheqjen dhe popullin e Emirateve të Bashkuara Arabe. Siguria në Gjirin Persik nuk është një çështje lokale; ajo është një domosdoshmëri globale. Çdo përpjekje për ta destabilizuar atë kërcënon jo vetëm rrugët energjetike, korridoret tregtare dhe arkitekturën e brishtë të paqes rajonale, por edhe ekuilibrin më të gjerë të sigurisë ndërkombëtare.
Komuniteti ndërkombëtar duhet të flasë me qartësi dhe unitet: agresioni i sponsorizuar nga shteti, sulmet me raketa kundër mjediseve civile dhe destabilizimi i qëllimshëm nga një regjim që vret popullin e vet në shkallë masive nuk mund të lënë asnjë vend për Republikën Khomeiniste në bashkësinë e kombeve, pavarësisht dallimeve në sisteme apo pikëpamjeve politike.
Rruga përpara për rajonin nuk shkruhet me raketa, por me njohje të ndërsjellë, integrim ekonomik dhe udhëheqje të përgjegjshme. Emiratet e Bashkuara Arabe, nën drejtimin vizionar të liderit të tyre të madh, Presidentit Mohammed Bin Zayed, kanë zgjedhur të jenë një far stabiliteti dhe përparimi për të gjitha kombet që duan paqen. Ata që zgjedhin errësirën dhe shkatërrimin duhet ta gjejnë veten të izoluar nga një botë që qëndron për stabilitet, bashkëpunim dhe paqe
(A2 Televizion)
A2 CNN Livestream
MUND TE LEXONI GJITHASHTU
