Kryeministri Edi Rama ka reaguar ndaj deklaratave që, sipas tij, keqinterpretojnë qëndrimin e tij lidhur me Transmetuesin Publik Shqiptar. Në një postim në X kreu i qeverisë shqiptare shprehet se po krijohet një model shqetësues i keqkuptimit të qëllimshëm të asaj që thuhet realisht, duke e cilësuar këtë si një formë dezinformimi.
“Po bëhet një model për të ardhur keq i kësaj epoke të re të përtacisë së shfrenuar ndaj dëgjimit të asaj që të tjerët realisht thonë, që të përballemi me deklarata si ajo e bashkëngjitura, të cilat pasqyrojnë një keqkuptim thellësisht të shtrembëruar të qëndrimit tim lidhur me Transmetuesin Publik Shqiptar”, shkruan Rama, raporton a2 CNN.
Ai thekson se vërejtjet e tij nuk kanë asnjë lidhje me kushtëzimin e financimit apo ekzistencës së RTSH-së me miratimin politik, duke i cilësuar këto interpretime si të pasakta dhe keqorientuese.
“Vërejtjet e mia nuk kanë të bëjnë absolutisht aspak me “lidhjen e financimit apo të ekzistencës së RTSH-së me miratimin politik”. Çdo interpretim i tillë është thjesht i pasaktë dhe keqorientues”, thekson ai.
Kryeministri u bën thirrje autorëve të deklaratave që të lexojnë ose dëgjojnë me kujdes fjalimin e tij dhe thelbin e mesazhit.
“I ftoj autorët e kësaj deklarate keqorientuese ta lexojnë ose ta dëgjojnë me kujdes fjalimin tim dhe të bëjnë një përpjekje të sinqertë për të kuptuar thelbin”, thekson Rama.
“Mbrojtja e informacionit nis me mos përhapjen e dezinformimit”, përsërit Rama. (A2 Televizion)
A2 CNN Livestream
MUND TE LEXONI GJITHASHTU
