Shqiptarja që kandidon për deputete në Mal të Zi: Abazoviç pati shansin e artë, nuk dha rezultatin që pritej

Më 11 qershor, në Malin e Zi zhvillohen zgjedhjet e përgjithshme parlamentare, ku për herë të parë, një parti shqiptare, si Unioni Demokratik Shqiptar, është bashkuar në koalicion me partitë malazeze, si Partia Demokratike e Socialistëve, Partia Social Demokrate dhe Partia Liberale.

Drita Lolla është shqiptare, por është e katërta në listën e PDS-së dhe kërkon të fitojë një mandat deputeti. Sipas saj, shqiptarët kanë përparuar shumë në vendin fqinj, që nga vitet 1990 kur të drejtat e tyre, si në gjithë ish-Jugosllavinë, ishin të shtypura. “Pavarësimi i Malit të Zi dhe hapja e negociatave me BE kanë qenë pozitive për shqiptarët. Tashmë veprojmë në një kontekst të avancuar, ku kemi një shtet të pavarur ku të drejtat e pakicave mbrohen. Në këtë realitet të ri, shqiptarët mund të pozicionohen në një format të ri politik. Patjetër që mund të bëhet më shumë, në kuptimin e rritjes së numrit të shqiptarëve që mbajnë poste drejtuese në qeveri”, tha Lolla në një intervistë në A2 CNN.

Një prej shembujve më të mirë të integrimit të shqiptarëve dhe rritjes së rolit të tyre në Malin e Zi ishte drejtimit të vendit nga Dritan Abazoviç, edhe pse mandati i tij si kryeministër ishte më tepër teknik, sesa politik. “Abazoviç kishte një shans të artë, në një moment mjaft delikat ku, edhe me besimin që i dha PDS në Parlament, ta fuste Malin e Zi në BE. Por nuk dha rezultatin që pritej. Pati një raport të pasinqertë ndaj shqiptarëve dhe shoqërisë malazeze”, tha Lolla.

“Mali i Zi ka kaluar periudhë të vështirë vitet e fundit. Stopimi i progresit për në BE, emërimet e dyshimta në sektorin e mbrojtjes dhe sigurisë, që cenuan besueshmërinë e Malit të Zi si anëtar i NATO-s. Fokusi ynë është rimëkëmbja ekonomike, por duke mos anashkaluar aspektin social, për të rimëkëmbur vendin”.

Kush është Drita Lolla?

E lindur në Ulqin, Llolla ka studiuar për farmaci në Tiranë dhe ka jetuar për 10 vite në Shqipëri. “E vlerësoj shumë periudhën e qëndrimit në Shqipëri, sepse përkon me formimin profesional. Të rinjtë duhet të qëndrojnë në vendin e tyre, prandaj u riktheva në vendlindje, për të avancuar pozitën e shqiptarëve, por dhe të gjithë qytetarëve në Malit të Zi”, thotë ajo.

U zgjodh kryetare e Aleancës së Grave të Partisë Demokratike të Socialistëve në nëntor 2021 dhe që atëherë drejton organizatën më të madhe politike të grave në Mal të Zi. Deri më sot, Aleanca e Grave ka mbledhur mbi 1,500 gra aktive politikisht përmes një strukture të përbërë nga këshilli qendror, kryesia dhe 24 organizata/këshilla komunal në të gjithë Malin e Zi.

Para angazhimit të saj politik, ka qenë aktive në sektorin civil dhe njihet për krijim e platformës "Seanema - art for social change" qëllimi i së cilës është promovimi i vlerave evropiane në mesin e të rinjve të Malit të Zi dhe rajonit.

Drita ka kryer dy studime master, në fushën e farmacisë në Universitetin e Mjekësisë së Tiranës, si dhe në fushën e studimeve të shkencës dhe teknologjisë në Universitetin e Edinburgut në Skoci. Ka ndjekur programe të shumta arsimore, përfshirë programin intensiv në fushën e së drejtës dhe ekonomisë evropiane në Fakultetin Juridik në Riga.

Drita është alumniste e programit të Departamentit Amerikan të Shtetit, bursiste e programit Chevening e Qeverisë së Mbretërisë së Bashkuar, si dhe alumniste e programit EUVP të Komisionit Evropian dhe Parlamentit Evropian. (A2 Televizion)