VIDEO/ Goli i jashtëzakonshëm i Valverdes që shpëtoi Realin

Një gol spektakolar nga Federico Valverde në minutat shtesë i dha Real Madridit një fitore të artë 1-0 ndaj Athletic Bilbaos, duke mbajtur gjallë shpresat për titullin në LaLiga.

Ndeshja nisi me ritëm të ngadaltë, ndoshta si pasojë e lodhjes nga angazhimet europiane gjatë javës. Vinícius Júnior ishte lojtari më aktiv në repartin ofensiv të madrilenëve, por rreziku i parë serioz erdhi vetëm në minutën e 27-të, kur goditja e tij fluturoi mbi traversë. Në minutat në vijim, Camavinga dhe Rodrygo u përpoqën të hapnin mbrojtjen e ngjeshur të miqve, por pa sukses konkret.

Bilbao bëri shumë pak në sulm, me vetëm një tentativë të Gorka Guruzeta-s që nuk shkaktoi asnjë rrezik. Real Madrid dominoi posedimin dhe mori nismën pas pushimit, me Camavinga, Rodrygo dhe Bellingham që provuan të mposhtnin portierin Unai Simón – i cili tregoi pse është numri një i Spanjës.

Goli i Vinícius në minutën e 80-të u anulua nga VAR për një pozicion jashtë loje minimal të Endrick, duke rritur tensionin në "Santiago Bernabéu". Por në minutën e fundit të kohës shtesë, Valverde goditi me një vole të fuqishme nga distanca, duke dërguar topin në trekëndësh dhe tifozët në delir.

Me këtë fitore, Real mbetet katër pikë pas Barcelonës, ndërsa Athletic ruan gjasat për një kualifikim historik në Champions League. (A2 Televizion)