Gjykata Kushtetuese e konsideroi cenim të së drejtës kushtetuese për të votuar vendimin e marrë nga Ministria e Shëndetësisë në 19 prill të vitit 2021, për të futur në karantinë dyjavore emigrantët që hynin në Shqipëri në atë periudhë për shkak të pandemisë së koronavirusit.
Por Florian Haçkaj, nga Shoqata “Diaspora për Shqipërinë”, që bëri edhe padinë në Gjykatën Kushtetuese, thotë se qëllimi kryesor nuk është arritur ende. “Kjo është vetëm një betejë e vogël për të fituar luftën e madhe, që është realizimi konkret i votës së diasporës, pra në momentin që më vjen letra në shtëpi gjithmonë votoj, atëherë e kemi realizuar këtë. Megjithatë jemi në rrugë të drejtë”, tha Haçkaj për A2 CNN. “Vendimi është për t’u përshëndetur sepse ka një fije shprese te drejtësia shqiptare. Do të thotë që është shkelur Kushtetuta e Shqipërisë në zgjedhjet e 25 prillit 2021”.
Sipas tij, fitorja e madhe është fakti që Gjykata Kushtetuese detyron ligjvënësin të plotësojë pjesën ligjore, brenda një viti nga publikimi në fletoren zyrtare. “Kjo na gëzon jashtë mase shumë, na jep shpresë, por edhe na motivon që të punojmë më fort”, thotë Haçkaj.
Sipas INSTAT, janë rreth 1,4 milionë shqiptarë me të drejtë vote që jetojnë jashtë Shqipërisë. Por për Haçkajn, shifra është shumë më e lartë. “Jam i bindur që shqiptarët që kanë ikur vitet e fundit në mënyrë ilegale nuk janë aty”, thotë ai. (A2 Televizion)
A2 CNN Livestream
MUND TE LEXONI GJITHASHTU
