Në vitin 1967, katër vite pas vrasjes së Presidentit John F. Kennedy, Jacqueline Kennedy, tashmë një nga gratë më të njohura në botë, udhëtoi drejt Kamboxhias, në një kohë kur rajoni tronditej nga lufta në Vietnam. Në kryeqytetin Phnom Penh, ajo u prit me nderime dhe u vendos në hotelin më luksoz të vendit, Hotel Le Royal, i ndërtuar që prej vitit 1929 dhe inauguruar nga mbreti Sisowath Monivong.
Për nder të ish-Zonjës së Parë, barmeni i hotelit krijoi një koktej special që do të mbetej legjendar: “Femme Fatale”. Përzierje e konjakut, shampanjës dhe kremit të luleshtrydheve, e zbukuruar me një lule, ky koktej elegant u bë simbol i finesës dhe misterit që shoqëronte gjithmonë Jacqueline Kennedy.
Pas luftës civile që rrënoi Kamboxhian, shumë nga sendet e vlefshme të hotelit u mbyllën në depo. Por, gjatë restaurimit të pronës në vitin 1996, kur hoteli u ble nga grupi Raffles, një punëtor thuhet se gjeti gotën origjinale nga e cila Jackie kishte pirë koktejin e saj, ende me shenjat e buzëkuqit. Sot, ajo gotë ekspozohet me krenari në një vitrinë në Elephant Bar, përkrah fotografive të vizitës së saj.
Në hotel ndodhet edhe suita “Kennedy”, ku një portret i ish-Zonjës së Parë qëndron mbi shtretërit me çarçafë të bardhë e dysheme me pllaka të ftohta. Në korridor gjendet një kopje e revistës Life, e blerë nga Raffles në eBay, e hapur në faqet që dokumentojnë udhëtimin e saj në Kamboxhia.
Ekspertja Elizabeth J. Natalle, autore e librit “Jacqueline Kennedy and the Architecture of First Lady Diplomacy”, e përshkruan këtë periudhë si “kohën kalimtare” të Jackie-t, mes dhimbjes pas atentatit dhe jetës së re që e priste. Gjatë vizitës, ajo shoqërohej nga diplomati britanik David Ormsby-Gore, me të cilin kishte një lidhje të afërt, edhe pse asnjëherë të kurorëzuar.
Megjithëse udhëtimi i saj u zhvillua në kulmin e tensioneve midis Shteteve të Bashkuara dhe Kamboxhias, Kennedy këmbënguli se qëllimi ishte thjesht vizita në Angkor Wat, një nga monumentet më të lashta dhe madhështore të Azisë. Njohëse e gjuhës frënge dhe e pasionuar pas historisë e artit, ajo përdori kulturën si mjet për një diplomaci të heshtur që mbillte respekt pa nevojë për fjalime politike.
Sot, pas dekadash ndryshimesh dhe luftërash, Raffles Hotel Le Royal mbetet një simbol i qëndrueshmërisë dhe elegancës së Phnom Penhit. Ka pritur personalitete si Charles de Gaulle, Angelina Jolie dhe madje edhe Presidentin Barack Obama. Por për shumë vizitorë, jehona e Jacqueline Kennedy dhe gota e saj me gjurmën e buzëkuqit mbeten kujtimi më i magjishëm i historisë së këtij hoteli. (A2 Televizion)
A2 CNN Livestream
MUND TE LEXONI GJITHASHTU
