David dhe Victoria Beckham kanë paguar shifrën rekord prej 72,3 milionë dollarësh për një pallat në buzë të detit në Miami Beach, raportoi sot portali i specializuar “TheRealDeal”.
Operacioni i blerjes së shtëpisë, që ndodhet në 4736 North Bay Road, u mbyll të hënën e kaluar, shkruan A2 CNN.
Çmimi fillestar ishte 80 milionë dollarë, që do të thotë se familja Beckham arriti një zbritje të konsiderueshme. Megjithatë, është shuma më e lartë e paguar deri më tani për një pronë në zonën ekskluzive të North Bay, ku ka me bollëk rezidenca të pasurish dhe VIP-ash.
Shtëpia e re e familjes Beckham ka nëntë banja, një palestër, një spa, një kinema në shtëpi, një pishinë dhe një kuzhinë. Shitësi është biznesmeni Niklas de la Motte, i cili bleu pronën në vitin 2018 për 10 milionë dollarë por dhjetëfishoi çmimin e saj me ndërtimin e një pallati të ri luksoz në tokë, projektuar nga studio e arkitekturës Choeff Levy Fischman.
Victoria dhe David Beckham, bashkëpronarë të ekipit të Inter Miami, zotërojnë gjithashtu një kat të plotë në kullën e Muzeut One Thousand projektuar nga arkitektja e ndjerë e lindur në Irak, Zaha Hadid, në qendër të Miami. Ata paguan rreth 19,8 milionë dollarë për pronën prej 929 metrash katrorë në vitin 2020, e cila, sipas The RealDeal, nuk është nxjerrë në shitje pavarësisht blerjes së shtëpisë së re. (A2 Televizion)
A2 CNN Livestream
MUND TE LEXONI GJITHASHTU
