Çdo kompani do të prekej nëse flluska e inteligjencës artificiale do të shpërthente. Kështu u shpreh për BBC-në kreu i firmës mëmë të Google, Alphabet, Sundar Pichai. Në një intervistë ekskluzive për BBC News, ai tha se ndërsa rritja e investimeve në inteligjencën artificiale (IA) kishte qenë një "moment i jashtëzakonshëm", kishte njëfarë "irracionaliteti" në bumin aktual të IA-së, përcjell A2 CNN.
Kjo vjen mes frikës në Silicon Valley dhe më gjerë për një flluskë, pasi vlera e kompanive të teknologjisë së inteligjencës artificiale është rritur ndjeshëm në muajt e fundit dhe kompanitë shpenzojnë shumë për industrinë në lulëzim.
I pyetur nëse Google do të ishte imun ndaj ndikimit të shpërthimit të flluskës së inteligjencës artificiale, z. Pichai tha se gjigandi i teknologjisë mund t’i përballonte asaj stuhie të mundshme, por lëshoi gjithashtu një paralajmërim.
"Mendoj se asnjë kompani nuk do të jetë imune, përfshirë edhe ne," tha ai, shkruan A2 CNN.
Ai foli gjithashtu për nevojat energjetike, ngadalësimin e objektivave klimatikë, investimet në Mbretërinë e Bashkuar, saktësinë e modeleve të tij të inteligjencës artificiale dhe efektin e revolucionit të inteligjencës artificiale në vende pune.
Intervista vjen në një kohë kur shqyrtimi i gjendjes së tregut të inteligjencës artificiale nuk ka qenë kurrë më intensiv.
Aksionet e Alphabet janë dyfishuar në vlerë brenda shtatë muajsh në 3.5 trilion dollarë (2.7 trilion paund), ndërsa tregjet janë bërë më të sigurta në aftësinë e gjigantit të kërkimit për të shmangur kërcënimin nga pronari i ChatGPT, OpenAI.
Një fokus i veçantë është zhvillimi nga Alphabet i superçipave të specializuar për inteligjencën artificiale që konkurrojnë me Nvidia-n, të drejtuar nga Jensen Huang, i cili kohët e fundit arriti një vlerësim prej 5 trilion dollarësh për herë të parë në botë.
Sipas tij IA do të ndikojë gjithashtu edhe në punën e disa profesioneve dhe se kush përshtatet do të ketë rezultate më të mira.
"Do të duhet të punojmë për të kapërcyer përçarjet shoqërore. kjo gjithashtu do të krijonte mundësi të reja. Do të evoluojë dhe do të ndryshojë disa vende pune, dhe njerëzit do të duhet të përshtaten", tha ai. Ata që përshtaten me inteligjencën artificiale "do të kenë rezultate më të mira".
"Nuk ka rëndësi nëse dëshiron të jesh mësues apo mjek. Të gjitha këto profesione do të ekzistojnë, por njerëzit që do të bëjnë mirë në secilin prej këtyre profesioneve janë ata që mësojnë si t'i përdorin këto mjete." (A2 Televizion)
A2 CNN Livestream
MUND TE LEXONI GJITHASHTU
