Për disa ditë Rinasi fokusoi pothuajse të gjithë vëmendjen e opinionit publik, ku aeroporti i vetëm në vend u mbyll për shkak të mungesës së kontrollorëve të trafikut ajror. Sipas qeverisë, ky ishte rezultati i një proteste të paligjshme të asaj kategorie, ndërkohë që për kontrollorët ishte thjesht ushtrimi i të drejtave të tyre, ku tashmë përballja i është futur rrugës gjyqësore. Avokati Florian Kola që mbron çështjen e një prej personave të arrestuar për shpërdorim detyre, Flora Ndrecës, thotë se shkaqet duhen parë më gjerë, ku sipas tij “ka patur indiferentizëm tek shteti, ata abuzojnë duke thënë që në gjithë boten ka patur reduktim të pagave. Është e vërtetë, por kjo ka ndodhur me marrëveshje, fakti që nuk ka patur marrëveshje, që nuk është folur me to dhe nuk është përcaktuar një afat ka bërë që kontrollorët të reagojnë”, thotë ai. Avokati nënvizon edhe që ndaj të arrestuarve është vendosur një mase jo proporcionale me ngjarjen. “Kontrollorët kanë plotësuar formularin e paaftësisë, diçka që është konsideruar si vepër penale, ndërkohë që kontrata e tyre e cilëson mosparaqitjen pa shkaqe të justifikuara si motiv për largim nga puna, dhe në asnjë rast në burg. Ata kanë shfrytëzuar deklaratën e paaftësisë, plotësimi i disa prej tyre i formularit i ka dhënë gjithçkaje formën e protestës, ndërkohë që është një instrument ligjor”, thotë ai për A2, duke shtuar në qoftë se shteti nuk kishte të ardhura mund t’i zëvendësonte, por nuk kishte sens të përgjysmonte rrogat. Për sa i përket rolit të Flora Ndrecës që ai përfaqëson, avokati deklaron se “ka qenë sekretare e sindikatës, ka patur të drejtë të informojë drejtuesit për deklaratat e paaftësisë, nuk ka rol tjetër përtej asaj të koordinatorit, për sa i përket shpërdorimit të detyrës, ajo është në arrest shtëpie, vendim që do të apelohet”. (A2 Televizion)
