Qeveria çeke ka shpallur gjendjen e jashtëzakonshme në pritje të një fluksi të madh refugjatësh ukrainas, që po ikin nga pushtimi i vazhdueshëm rus. Rreth 30,000 ukrainas kanë hyrë tashmë në Republikën Çeke që kur Rusia nisi sulmin ushtarak në Ukrainë.
"Ne po e zbatojmë atë thjesht për arsye teknike, kështu që ne mund të përballojmë fluksin e refugjatëve," tha të mërkurën kryeministri çek Petr Fiala gjatë një konference për shtyp.
“Në asnjë mënyrë kjo nuk do të prekë qytetarët çekë,” shtoi ai.
Ministria e Brendshme vlerëson se rreth 5,000 refugjatë mbërrijnë në Republikën Çeke çdo ditë. Qeveria pretendon se një gjendje e jashtëzakonshme është e nevojshme për të menaxhuar në mënyrë efektive fluksin e migracionit. Në çdo rajon çek, do të krijohet një pikë e veçantë për ukrainasit.
Qeveria do të derdhë 39 milionë euro shtesë në buxhetin e mbrojtjes së shtetit. Fiala siguroi gjithashtu qytetarët çekë se nuk ka nevojë të kenë frikë pasi vendi është i sigurt.
“Nuk kemi asnjë sinjal rreziku. Ne jemi pjesë e BE-së dhe NATO-s, e cila garanton sigurinë tonë”, shtoi Fiala.
Ai gjithashtu theksoi se pavarësisht sanksioneve kundër Rusisë, vendi ka rezerva të mjaftueshme gazi dhe nafte. "Në terma për frymë, kapacitetet e depozitimit të gazit në Republikën Çeke janë ndër më të lartat në Evropë," tha Fiala.
Gjendja e jashtëzakonshme do të hyjë në fuqi të premten dhe do të zgjasë 30 ditë, por ajo mund të zgjatet nga qeveria nëse është e nevojshme.
Gjatë dy viteve të fundit, gjendja e jashtëzakonshme është shpallur disa herë për shkak të pandemisë COVID-19. Këtë herë nuk do të zbatohen masa kufizuese. (A2 Televizion)
A2 CNN Livestream
MUND TE LEXONI GJITHASHTU
