Një tjetër mjek ka humbur betejën me koronavirusin në vendin tonë. Bëhet fjalë për mjekun 50-vjeçar Geron Husi, i cili punonte si mjek endokrinolog në Qendrën Spitalore Universitare “Nënë Tereza”.
Lajmi i trishtë është bërë publik nga mjeku Tritan Kalo, me anë të një mesazhi prekës në Facebook, ku edhe shpreh vlerësimet dhe ngushëllimet për kolegun e tij.
Edhe ministrja Manastirliu ka shprehur ngushëllimet për vdekjen e mjekut Gerond Husi.
“E hidhëruar nga lajmi për ndarjen e parakohshme nga jeta të dr. Gerond Husit, njeri dhe profesionist i shkëlqyer, që nuk ia doli dot në betejën me covid19. Dr. Geri i ka shërbyer me mijëra pacientëve në Shërbimin e Endokrinologjisë në QSUT, profesionist i rrallë dhe i palodhur në komunikim me pacientët. Dr. Geri do i mungojë të gjithëve, Matildës dhe djalit të tij të dashur, familjes, miqve, kolegëve dhe të gjithë atyre që i shërbeu me aq humanizëm. U prehsh në paqe Dr. Geri”, shkruan ministrja.
Postimi i Tritan Kalos
Kohë kovidiane. 13.03.2021. E pabesueshme por dhembshurisht e vërtetë. Sars-Cov2/Covid-19 edhe kësaj here goditi tinëzisht. Armatës së Mantelbardhëve nga sot e tutje do t’i mungojë një anëtar i shquar i saj, Dr. Geron Husi. Gojëmbëli, zemërmadhi, mëndjendrituri, buzëgazi, fjalëpaku dhe punëshumi si ai.
Vinte kurdoherë te ne në Infektiv për konsultat Endokrinologjike, e sillte kurdoherë me vete një fllad induktues të optimizmit jetësor. I kthjellët, i saktë e profesionalisht i përkryer në çdo gjë që bënte.
Kam mbi 30 vite njohje personale me Dr. Gerin, ndaj edhe tash që po hedh këto fjalë në FB tim ende nuk më besohet se është ky takimi im i fundit me të. Buzëqeshja, optimizmi dhe humori yt do mbeten përjetësisht të skalitura në mëndjen time. Dr. Matildës dhe Ergit ju shpreh ngushëllimet më vëllazërore. Të bëhen të fortë dhe të jenë kurdoherë krenar për Mjekun, Bashkëshortin, Babain dhe Kolegun tonë shëmbullor, Dr. Geron Husin. U prehsh në Paqen e përjetshme Mik!!! (A2 Televizion)
A2 CNN Livestream
MUND TE LEXONI GJITHASHTU
