Henri Delaunay ishte sekretari i përgjithshëm i Federatës Franceze të Futbollit. Ai është personi që pati idenë brilante që të krijonte një Kampionat Europian që në vitin 1927. Ai vdiq pesë vite para se edicioni i parë i Europianit të zhvillohej, në vitin 1960. Trofeu mban edhe sot emrin e tij. 
Kampionati Europian nisi si një turne me vetëm 4 skuadra në vitin 1960. Në vitin 1980 u shtuan në 8, ndërsa në Euro 1996 u bënë 16 skuadra. Nga Europiani i vitit 2016, numri i skuadrave pjesëmarrëse është 24. 
Në Kampionatin Europian të vitit 1968, në gjysmëfinalen mes Italisë dhe Bashkimit Sovjetik, pas barazimit, u hodh monedha për të përcaktuar cila prej skuadrave do të kalonte në finale. Italia fitoi “lotarinë” dhe më pas finalen kundër Jugosllavisë. 
Sot të gjithë mbajnë mend penalltinë e Francesco Totti-t kundër Van der Sar në Euro 2000, por ai stil i kalimit të topit me hark quhet Panenka, për nder të sulmuesit të Republikës Çeke që e realizoi penalltinë e tij në finalen e Euro 1976, kundër Gjermanisë. 
Lothar Matthaus ka luajtur 4 herë në Kampionatin Europian, në harkun e 20 viteve. Legjenda e Gjermanisë ka qenë pjesë e skuadrës për Euro 1980, 194 dhe 1988, por mungoi në Euro ’92 dhe ’96, për t’u rikthyer në Euro 2000, kur Gjermania tashmë ishte bashkuar. 
Michel Platini ka qenë një prej lojtarëve më të mirë që kanë marrë pjesë në Kampionatin Europian, në turneun e vitit 1984, të fituar nga Franca, sulmuesi shënoi 9 nga 14 golat e skuadrës së tij. 
Kur thua Marco van Basten, nuk mund të mos kujtosh golin spektakolar kundër Bashkimit Sovjetik në finalen e Euro 1988. Një kryevepër që mbetet edhe sot ndër golat më të bukur të shënuar në këtë turne. 
Skuadra kampione e vitit 1992 u shpall Danimarka, pasi mundi në finale Gjermaninë kampione të botës. Përtej befasisë së fitores, më spektakolar është fakti që danezët nuk ishin kualifikuar për turneun, por u thërritën në vend të Jugosllavisë, të përjashtuar për shkak të luftës. 
Oliver Bierhoff është lojtari i parë që realizoi një “Gol të Artë” në Europian. Sistemi jetëshkurtër për të vendosur fatin e ndeshjeve i jepte fitoren skuadrës së parë që shënonte në kohën shtesë. Gjermani e bëri këtë kundër Republikës Çeke në finalen e Euro ’96. 
Greqia kuotohej nga bastexhinjtë me koeficient 150 për fitimin e Euro 2004, por në fund ishte pikërisht ajo që ngriti trofeun. Edhe pse me një lojë jo shumtë të bukur, grekët shtangët portugezët organizatorë, duke fituar 1-0 në finale. 
Nuk u bë asnjëherë aq i mirë saç mendonte Roberto Mancini, por në gjysmëfinalen kundër Gjermanisë në Euro 2012 Mario Balotelli shënoi dy gola dhe pozoi me fanellën e hequr duke krijuar një çast ikonë të turneut. 
Në Euro 2016, Shqipëria bëri debutimin e saj në një kompeticion të këtij niveli. Një moment historik për kombin tonë, por edhe për Taulant Xhakën, i cili në ndeshjen në grup kundër Zvicrës, u përball me Granit Xhakën, vëllain e tij të vogël. Hera e parë në historinë e turneut që dy vëllezër luajnë kundër njëri-tjetrit.
(A2 Televizion)
Galeria fotografike ( )
A2 CNN Livestream
MUND TE LEXONI GJITHASHTU
