Një përplasje tragjike mes një skafi që transportonte emigrantë dhe një anije patrullimi të Rojës Bregdetare greke, pranë ishullit Chios në Egjeun lindor, ka shkaktuar vdekjen e të paktën 14 personave. Lajmi u konfirmua nga autoritetet greke, të cilat njoftuan se operacioni i kërkim-shpëtimit vazhdon ende për të gjetur persona të tjerë që mund të rezultojnë të zhdukur, përcjell A2 CNN.
Në operacion janë përfshirë katër anije patrullimi, një helikopter i forcave ajrore dhe një mjet privat me zhytës. Sipas Rojës Bregdetare, 24 persona janë shpëtuar dhe janë transportuar në spitalin e Chios, së bashku me dy efektivë që mbetën të plagosur gjatë incidentit. Ende nuk është e qartë se sa prej të mbijetuarve kanë pësuar lëndime të rënda dhe as numri i saktë i personave që ndodheshin në skaf.
Pamjet e publikuara nga mediat lokale greke tregojnë persona të mbështjellë me batanije që transportohen drejt ambulancave, ndërsa dy fëmijë shoqërohen nga efektivët. Autoritetet nuk kanë dhënë ende detaje mbi mënyrën se si ndodhi përplasja apo mbi identitetin e viktimave.
Greqia mbetet një nga pikat kryesore të hyrjes në Bashkimin Europian për njerëzit që largohen nga lufta dhe varfëria, ndërsa kalimet e rrezikshme në Egje vazhdojnë pa ndërprerje. (A2 Televizion)
A2 CNN Livestream
MUND TE LEXONI GJITHASHTU
