Prokuroria në Serbi bëri me dije se 11 persona janë arrestuar në lidhje me shembjen e një çatie në fillim të këtij muaji në një stacion treni në qytetin verior të Novi Sadit, që la pas vetes 15 të vdekur dhe dy të plagosur rëndë.
Të dyshuarit, të cilët nuk janë identifikuar, përballen me akuza për kryerjen e veprave penale kundër sigurisë publike, shkaktimin e rrezikut publik dhe punët e parregullta ndërtimore.
Mediat serbe raportuan se Goran Vesiç, i cili dha dorëheqjen si ministër i Ndërtimit pas ngjarjes, është në mesin e të arrestuarve.
Arrestimet u kryen pasi një valë protestash shpërtheu pas tragjedisë, në të cilat u kërkua që përgjegjësit të vihen para drejtësisë dhe të ndëshkohen. Shumë në Serbi besojnë se shembja e çatisë ishte rezultat i korrupsionit dhe mungesës së transparencës që çoi në punë të ngadaltë në rinovimin e ndërtesës së stacionit të trenit.
Politikanët e opozitës që qëndrojnë prapa protestave shprehën rezerva rreth arrestimeve dhe kërkuan që rasti të trajtohet nga prokurorët që luftojnë krimin e organizuar.
Ligjvënësit e opozitës dhe grupe protestuesish të tjerë u përleshën të mërkurën me policinë jashtë ndërtesës së gjykatës në Novi Sad, duke kërkuar aktakuza për shembjen e çatisë dhe lirimin nga paraburgimi të aktivistëve që u burgosën gjatë protestave të mëparshme.
Presidenti autoritar i Serbisë, Aleksandar Vuçiç i përshkroi protestat e opozitës si “terror” dhe “dhunë brutale nga disa faktorë politikë”. Vuçiç theksoi se "do t'i mposhtim banditët... ne nuk kemi frikë".
Ndërtesa e stacionit hekurudhor në Novi Sad u ndërtua fillimisht në vitin 1964. Ajo u rinovua dy herë në vitet e fundit si pjesë e një marrëveshjeje më të gjerë të infrastrukturës me kompanitë shtetërore kineze. VOA (A2 Televizion)
A2 CNN Livestream
MUND TE LEXONI GJITHASHTU
