Amerika sekuestron avionin e Maduros, lideri i opozitës në Venezuelë në kërkim, shpalli fitoren në zgjedhje

Nicolas Maduro godet rëndë opozitën në Venezuelë. Një gjykatës ka lëshuar një urdhër-arrest për Edmundo Gonzalez, kandidatin e opozitës në zgjedhjet e fundit presidenciale. Kjo erdhi pas një kërkese të prokurorit publik, një funksionar besnik i presidentit Maduro. 61-vjeçari, në pushtet prej shumë vitesh, u shpall fitues në zgjedhjet e korrikut nga Këshilli Elektoral, që përbëhet kryesisht nga njerëz të qeverisë.

Por njerëzit e Maduros ende nuk kanë publikuar ndonjë provë që vërteton pretendimin e tyre për fitore, ndërsa opozita ka përsëritur vazhdimisht se të dhënat kanë treguar triumfin e madh të Gonzales.

“Ky frikacak jep urdhra për të punësuar komando, mbështet dhunën që ne po pësojmë dhe mundëson ndërprerjet në energji elektrike. Ky burracak, Gonzales Urrutia, guxon të thotë se nuk njeh institucionet tona. Prandaj shumica e njerëzve në Venezuelë pajtohen se ligjet duhet të funksionojnë, që duhet të ketë rend, që kushtetuta duhet të respektohet dhe institucionet qeveritare duhet të bëjnë punën e tyre”, tha Nicolas Maduro, president i Venezuelës.

Lëshimi i urdhër-arrestit paraqet rritjen më të madhe të tensioneve politike në vendin e Amerikës Jugore. Gonzales që garoi kundër Maduros në presidencialet e fundit, ka bërë bashkë opozitën në mbështetjen e pretendimit se fitoi zgjedhjet me mbi 30% diferencë. Kjo besohet se ka shtyrë prokurorinë të kërkojë arrestimin e tij, ndërsa akuzohet për krime serioze, përfshirë uzurpimin e funksioneve publike, falsifikim dokumentesh, nxitje të kryengritjeve dhe sabotim të sistemit. Gonzales, i cili ka qenë në arrati dhe po fshihet në një vend sekret që pas zgjedhjeve, mohon të ketë kryer diçka të gabuar.

Kjo vjen në një kohë kur Departamenti Amerikan i Drejtësisë, sekuestroi avionin e përdorur nga presidenti Maduro, me arsyetimin se është blerë në shkelje të sanksioneve të vendosura nga SHBA kundër Venezuelës. Maduro reagoi duke akuzuar Uashingtonin për sjellje piratësh dhe vendosjen ilegale të pushtetit amerikan përreth botës. (A2 Televizion)