Ukraina kontrollon mbi 1250 kilometra katrorë të tokës së Rusisë. Këtë e konfirmoi presidenti Volodymyr Zelensky duke sqaruar se trupat e tij zotërojnë të paktën 92 vendbanime në rajonin kufitar rus të Kurskut, në të cilin kanë hyrë që prej 6 gushtit.
Në një fjalim të mbajtur përpara ambasadorëve në Kiev, lideri ukrainas kërkoi nga vendet aleate që të lejojnë ushtrinë ukrainase të përdorë armët me rreze të gjatë për të ndaluar përparimin e Rusisë në lindje.
“Në përgjithësi, ky operacion është bërë investimi ynë më i madh në procesin e çlirimit të burrave dhe grave ukrainase nga robëria ruse. Ne kemi kapur tashmë numrin më të madh të të burgosurve rusë në një operacion të vetëm, dhe ky është një rezultat domethënës. Ne po përjetojmë tani një zhvendosje të rëndësishme ideologjike, të gjithë konceptin naiv dhe imagjinar të të ashtuquajturave vija të kuqe të Rusisë, që kanë dominuar vlerësimet e disa prej partnerëve tanë, por që janë shembur. Bota po e sheh tani se gjithçka në këtë luftë varet vetëm nga guximi”, tha Volodymyr Zelensky.
Rusia pranon në një farë mënyre situatën e vështirë me betejën për rajonin e saj, Kursk, duke konfirmuar se 17 persona janë vrarë nga ushtria ukrainase. Të plagosurit janë mbi 140, mes të cilëve dhe 4 fëmijë.
Megjithatë Kievi njofton se trupat e Moskës po avancojnë në Donjeck dhe urdhëron evakuimin e civilëve nga një qytet me mbi 50 mijë banorë. Në këtë përplasje ka lëvizur dhe Bjellorusia duke pretenduar dërgimin e ushtarëve, avionëve dhe armëve të rënda në kufirin me Ukrainën.
Por Kievi mohon duke theksuar se nuk ka parë ndonjë shtim të trupave bjelloruse. Deklaratat e presidentit Lukashenko janë konsideruar thjeshtë retorikë për të kënaqur Putinin. Ndërkohë, parlamenti i Ukrainës ka ndaluar Kishën Ortodokse të lidhur me Rusinë.
Ky vendim vjen kryesisht si një ndëshkim ndaj patriarkut të Moskës që shpesh ka mbështetur veprimet e Kremlinit në luftë. (A2 Televizion)
A2 CNN Livestream
MUND TE LEXONI GJITHASHTU
