Shefi i politikës së jashtme të BE-së, Josep Borrell, ka bërë thirrje për armëpushim të menjëhershëm të çdo operacioni të mëtejshëm izraelit në Liban. Pas bisedimeve urgjente midis ministrave të jashtëm të BE-së, Borrell tha tani duhet të heshtin armët dhe të flasë diplomacia.
“Ky është momenti i së vërtetës për Libanin. BE bën thirrje për një armëpushim të menjëhershëm dhe zbatimin e njëkohshëm të rezolutës së OKB-së. Tani duhet të heshtin armët dhe të dëgjohet zëri i diplomacisë. Duhet të përfundojnë sulmet e Hezbollahut, të respektohet pavarësia e Libanit dhe të shmangen veprimet e mëtejshme ushtarake”, tha në fund të takimit Përfaqësuesi i Lartë i BE-së, Josep Borrell.
“Sovraniteti i Izraelit dhe i Libanit duhet të garantohet dhe çdo ndërhyrje e mëtejshme ushtarake do ta përkeqësojë në mënyrë dramatike situatën dhe duhet të shmanget”, tha më tej ai, raporton A2.
Borrell tha se BE ishte e gatshme të rrisë mbështetjen e saj për forcat e armatosura libaneze dhe mund të ndihmojë në forcimin e çdo përpjekjeje të paqeruajtësve të OKB-së për të qetësuar situatën.
Siç shkruan A2, fuqitë ndërkombëtare po përpiqen të parandalojnë që konflikti midis Izraelit dhe Hezbollahut të mbështetur nga Irani të shndërrohet në një luftë më të gjerë pas vrasjes së liderit të grupit Hassan Nasrallah.
Bashkimi Evropian prej 27 vendesh deri më tani ka luftuar për të folur me një zë, ose për të ushtruar shumë ndikim, për të frenuar dhunën që ka tronditur rajonin.
Izraeli paralajmëroi të hënën se mund të dërgonte trupa për të luftuar Hezbollahun, duke thënë se beteja nuk kishte përfunduar pavarësisht vrasjes së Nasrallah të premten.
Presidenti i SHBA Joe Biden dhe Sekretari i Përgjithshëm i Kombeve të Bashkuara Antonio Guterres kanë kundërshtuar çdo pushtim tokësor të fqinjit verior të Izraelit. (A2 Televizion)
A2 CNN Livestream
MUND TE LEXONI GJITHASHTU
