Rritja e nivelit të oqeaneve po na kërcënon të gjithëve. Është alarmi që ngre Sekretari i Përgjithshëm i organizatës së Kombeve të Bashkuara, Antonio Guterres, i cili paralajmëron se temperaturat e oqeaneve në ishujt e Paqësorit po rriten deri në tre herë më shumë se mesatarja globale, dhe se popullsia atje ishte tejet e ekspozuar nga impakti i rritjet së nivelit të detit.
Duke folur për gazetarët në Tonga, ku po mbahet forumi i ishujve të paqësorit, Guterres nënvizoi gjetet e një raporti që tregon se Paqësori jug-perëndimor është më i godituri nga rritja e nivelit të ujit, në disa vende më shumë se dyfishi i mesatares globale përgjatë 30 viteve të fundit.
Vërshimet e ujit do të vijnë tek të gjithë ne, paralajmëroi Guterres. “Bota duhet të shikojë nga Paqësori dhe të dëgjojë shkencën. Kjo është një situatë e çmendur – rritja e deteve është një krizë tërësisht e krijuar nga njerëzimi. Një krizë që së shpejti do të përkeqësohet në një shkallë pothuajse të paimagjinueshme, pa asnjë varkë shpëtimi që të na kthejë në siguri. Por nëse shpëtojmë Paqësorin, shpëtojmë edhe veten tonë. Bota duhet të veprojë dhe t'i përgjigjet alarmit para se të jetë tepër vonë", tha Guterres, raporton A2 CNN.
Sekretari i Përgjithshëm i OKB tha se ndotësit e mëdhenj të tokës, kanë përgjegjësinë e qartë për të reduktuar emetimet e dioksidit të karbonit, ose në të kundërtën bota rrezikohet nga një katastrofë.
Pas një hap të tillë sipas Guterres, ishujt në Paqësor mund të presin rritje shtesë të nivelit të detit prej 15 centimetrash deri në 2050 dhe 30 ditë përmbytje bregdetare./ A2 CNN (A2 Televizion)
A2 CNN Livestream
MUND TE LEXONI GJITHASHTU
