Qeveria e udhëhequr nga Daniel Ortega dhe bashkëpresidentja Rosario Murillo në Nikaragua, ka futur kufizime të reja mbi lirinë fetare dhe aksesin në informacion, duke ndaluar hyrjen në vend të Biblave, librave, revistave dhe gazetave të shtypura. Lajmi u raportua nga mediat kryesore të pavarura, të cilat theksuan se si ndalimi prek kryesisht turistët dhe udhëtarët që mbërrijnë nga toka.
Vendimi u konfirmua nga kompania ndërkombëtare Tica Bus, e cila operon autobusë midis San José, Kosta Rikës dhe Managuas, dhe vendosi njoftime në stacionet e saj. Ndër sendet e ndaluara janë kamerat, dronët dhe materiale të tjera të përcaktuara si "të ndjeshme" nga autoritetet.
Masa, e cila i atribuohet urdhrave të drejtpërdrejtë të qeverisë, ka ngritur shqetësime serioze midis organizatave fetare dhe vëzhguesve të të drejtave të njeriut, të cilët denoncojnë një shtrëngim të mëtejshëm të kontrollit shtetëror.
Organizata Christian Solidarity Worldwide (CSW) shprehu alarm, duke vënë në dukje se priftërinjtë dhe udhëheqësit fetarë në vend tashmë i janë nënshtruar arrestimeve arbitrare dhe se festimet publike lejohen vetëm për grupet që konsiderohen të afërta me regjimin. Organizata beson se ndalimi është pjesë e një modeli sistematik të shtypjes së shprehjeve fetare të paangazhuara. "Ne i bëjmë thirrje qeverisë së Nikaraguasë që ta heqë menjëherë këtë ndalim", tha Anna Lee Stangl, Drejtoreshë e CSW për Amerikën. (A2 Televizion)
A2 CNN Livestream
MUND TE LEXONI GJITHASHTU
