Danimarka tregon muskujt në Groenlandë

Danimarka po organizon këtë muaj një nga stërvitjet më të mëdha ushtarake në Groenlandë, me pjesëmarrjen e një fregate, avionëve luftarakë F-16, forcave speciale, trupa shtesë dhe rritje të ndjeshme të mbikëqyrjes mbi infrastrukturën kritike të ishullit arktik.

Në një intervistë për Reuters më 25 qershor, kreu i Komandës Arktike të Danimarkës, Soren Andersen, theksoi se nuk është i shqetësuar për një marrje të mundshme të Groenlandës nga Shtetet e Bashkuara, pas një takimi të fundit me një gjeneral të lartë amerikan. Megjithatë, ai paralajmëroi se nevojitet një përforcim i mbrojtjes për të penguar çdo kërcënim të mundshëm rus në Arktik, shkruan A2 CNN.

Presidenti amerikan Donald Trump ka sugjeruar disa herë blerjen e Groenlandës, një territor gjysmë-autonom i Danimarkës, me rëndësi strategjike për sistemin amerikan të paralajmërimit të raketave balistike, duke qenë në një nga rrugët më të shkurtra midis Amerikës së Veriut dhe Europës. Trump nuk e ka përjashtuar as përdorimin e forcës për të marrë territorin, por Andersen e përjashtoi kategorikisht një skenar të tillë, duke deklaruar: “Një gjë e tillë nuk më shqetëson aspak”. Ai shtoi se takimi i tij me gjeneralin amerikan Gregory Guillot, i ngarkuar për mbrojtjen e rajonit, ishte i pari dhe një hap i rëndësishëm për bashkëpunimin.

Aktualisht, Danimarka mban një prani të përhershme në Groenlandë me katër anije patrulluese të vjetra, një avion të vogël mbikëqyrës dhe patrulla me qentë e dëborës, që përpiqen të monitorojnë një sipërfaqe katër herë më të madhe se ajo e Francës, shkruan A2 CNN. Komanda e përbashkët arktike, e cila më parë ishte përqendruar më së shumti në detyra civile si kërkim-shpëtimi dhe inspektimi i peshkimit, tani po e zhvendos vëmendjen drejt mbrojtjes territoriale.

Në fillim të vitit, qeveria daneze angazhoi mbi 2 miliardë dollarë për të forcuar mbrojtjen në Arktik, përmes ndërtimit të anijeve të reja ushtarake për zonat polare, dronëve me rreze të gjatë veprimi dhe përmirësimit të mbulimit satelitor. Ky zhvillim vjen në një kohë të rritjes së tensioneve gjeopolitike në Arktik, ku fuqitë e mëdha si Rusia dhe SHBA po garojnë për influencë dhe burime natyrore në rajonin gjithnjë e më të aksesueshëm për shkak të ndryshimeve klimatike.

(A2 Televizion)