Në 80-vjetorin e përfundimit të Luftës së Dytë Botërore, Kina tregoi fuqinë e saj me paradën ushtarake të organizuar sot në sheshin Tiananmen, duke prezantuar "triadën bërthamore", raketat hipersonike, dronët dhe teknologjitë e reja luftarake.
Me paradën mbresëlënëse Kina ka paraqitur imazhin e saj si një superfuqi ushtarake në ngritje me gjithë solemnitetin e duhur, teksa dhjetëra mijëra ushtarë, tanke dhe automjete të blinduara përmbytën sheshin Tiananmen, ndërsa avionë luftarakë fluturuan mbi kryeqytetin kinez, duke i dërguar Perëndimit një mesazh të pazakontë force.
Pavarësisht natyrës përkujtimore të kësaj dite, Presidenti Xi Jinping zgjodhi të kthehej nga e ardhmja.
“Ata donin t'i tregonin botës se po kombinojnë të vjetrën me të renë. Ata treguan fuqi tradicionale, por edhe sisteme të reja armësh që nuk janë parë kurrë në publik”, tha analisti ushtarak Michael Clarke.
Në paradë morën pjesë të gjitha degët e ushtrisë kineze, së bashku me njësitë më të reja të krijuara vitet e fundit, si "njësia kibernetike", përgjegjëse për mbrojtjen në luftën kibernetike, dhe "forca e mbështetjes së informacionit", e krijuar në vitin 2024 për të rritur gatishmërinë luftarake me rrjete dhe sisteme informacioni.
Zbulimi i madh ishte prezantimi i "Triadës bërthamore" të Kinës, me armët bërthamore ajër-ajër, tokë-det dhe det-tokë. Ndër sistemet që debutuan ishin raketa ajër-tokë me rreze të gjatë veprimi JL-1, raketa JL-3 e lëshuar nga nëndetëset, raketa tokësore DF-61 dhe DF-31 e re.
Sipas agjencisë së lajmeve Xinhua, ato janë "aset strategjik" i Kinës në mbrojtjen e sovranitetit të saj.
Në të njëjtën kohë, u prezantuan raketa hipersonike kundër anijeve, të tilla si Yingji-19, Yingji-17 dhe Yingji-20, të cilat janë testuar në transportues avionësh të rremë amerikanë.
"Këto raketa janë projektuar për të trembur Shtetet e Bashkuara", theksoi Clark.
Kina gjithashtu vendosi theksin tek sistemet pa pilot, me prezantimin e dronëve dhe "ujqërve robotë" të instaluar në automjete. Në paradë u paraqit edhe droni nënujor AJX002, si dhe helikopterë të rinj pa pilot për përdorim në anijet luftarake.
Prezantimi i një arme lazer për t'iu kundërvënë droneve shkaktoi një ndjesi të veçantë.
"Ata e kishin mbajtur të fshehur gjatë provave dhe papritmas u shfaq në paradë, si një dritë e madhe kërkimi në një automjet", tha Clark, duke vënë në dukje se, megjithëse nuk janë aq revolucionare sa paraqiten, armët lazer demonstrojnë strategjinë e Kinës për të zhvilluar mbrojtje më të lira dhe më efektive kundër kërcënimeve të mjeteve ajrore pa pilot.
Dy avionët luftarakë të gjeneratës së pestë të Kinës, Chengdu J-20 dhe Shenyang J-35A, të projektuar si përgjigje ndaj avionit amerikan F-35, fluturuan mbi qiellin e Tiananmenit. Kina është i vetmi vend përveç Shteteve të Bashkuara dhe Rusisë që ka avionë të tillë, së bashku me Su-57 të Rusisë.
“Kina ka treguar se ka një gamë të plotë sistemesh armësh tokësore, detare dhe ajrore. Në letër, është jashtëzakonisht mbresëlënëse. Nuk është ende aq e fuqishme sa ushtria amerikane, por sigurisht që e rivalizon atë dhe shqetëson planifikuesit ushtarakë amerikanë”, vuri në dukje Clark.
Parada e Tiananmenit, me morinë e sistemeve të reja dhe prezantimin e triadës bërthamore, nuk ishte vetëm një homazh për të kaluarën, por edhe një mesazh për Perëndimin, pasi Kina aspiron të bëhet protagoniste në ripërcaktimin e ekuilibrave globalë. (A2 Televizion)
A2 CNN Livestream
MUND TE LEXONI GJITHASHTU
