Uashingtoni po dërgon më shumë anije luftarake dhe trupa në Lindjen e Mesme, ndërsa Presidenti amerikan Donald Trump po shqyrton mundësinë e rifillimit të sulmeve në shkallë të gjerë kundër Iranit pas zgjedhjeve afatmesme, raportoi Associated Press (AP).
Trump u tha gazetarëve të enjten se duhet të marrë një vendim: “Ose Irani nënshkruan një marrëveshje shumë të drejtë, ose nuk do të ekzistojë më”. Në një intervistë për revistën Time, të publikuar po atë ditë, ai tha se sulme të reja ndaj Republikës Islamike janë “të mundshme” pas zgjedhjeve amerikane të 3 nëntorit, por nuk pranoi të jepte detaje të mëtejshme.
Në artikullin e saj të së enjtes, AP raportoi se një aeroplanmbajtëse e tretë dhe rreth 9 mijë trupa shtesë, përfshirë 7 mijë marinsa të flotës dhe 2 mijë marinsa të këmbësorisë, janë aktualisht duke u nisur drejt zonës së konfliktit me Iranin.
Kjo do ta rriste praninë ushtarake amerikane në Lindjen e Mesme në mbi 20 mijë trupa, një shifër që AP e cilësoi si “jashtëzakonisht të lartë”.
Forcat që janë në lëvizje përfshijnë grupin e sulmit të aeroplanmbajtëses USS Theodore Roosevelt, së bashku me kryqëzorin USS Chosin, si dhe grupin e gatishmërisë amfibe USS Makin Island, ku bëjnë pjesë anijet amfibe të zbarkimit USS John P. Murtha dhe USS Anchorage, i tha agjencisë një zyrtar amerikan, i cili nuk u identifikua me emër. (A2 Televizion)
A2 CNN Livestream
MUND TE LEXONI GJITHASHTU
