Kryeministri i Izraelit, Benjamin Netanyahu, ka deklaruar se vendi i tij do të “pezullojë” sulmet e mëtejshme ndaj fushave të gazit në Iran, pas një kërkese të bërë nga presidenti amerikan Donald Trump, raporton A2CNN.
Në një konferencë për shtyp të mbajtur mbrëmjen e kaluar, Netanyahu tha se vendimi synon të shmangë përshkallëzimin e mëtejshëm të konfliktit në Lindjen e Mesme. Ai gjithashtu hodhi poshtë akuzat se kishte tërhequr SHBA-në në luftë kundër Iranit.
Ndërkohë, situata në terren mbetet e tensionuar. Shpërthime janë raportuar si në Jerusalem ashtu edhe në Tehran. Ministri i Jashtëm i Iranit ka paralajmëruar më herët se vendi do të reagojë me “zero përmbajtje” nëse sulmet ndaj infrastrukturës së tij vazhdojnë.
Gjatë orëve të fundit, disa shtete të Gjirit Emiratet e Bashkuara Arabe, Arabia Saudite dhe Bahreini kanë raportuar sulme me raketa dhe dronë. Emiratet e Bashkuara Arabe dhe Bahreini i kanë atribuar këto sulme agresionit iranian.
Sipas organizatave për të drejtat e njeriut numri i viktimave në Iran ka arritur në 3,186 që nga fillimi i luftës më 28 shkurt.
Ndërkohë, ndikimi ekonomik po ndihet globalisht. Çmimet e gazit janë rritur ndjeshëm në Mbretërinë e Bashkuar dhe në Evropë pas sulmit ndaj kompleksit energjetik Ras Laffan Industrial City në Katar. Kryeministri i Katarit e ka cilësuar këtë sulm si një “përshkallëzim shumë të rrezikshëm nga ana e iranianëve”.
Zhvillimet e fundit tregojnë se konflikti po hyn në një fazë gjithnjë e më të rrezikshme, me pasoja potenciale për sigurinë rajonale dhe tregjet globale të energjisë. (A2 Televizion)
A2 CNN Livestream
MUND TE LEXONI GJITHASHTU
