Një tërmet i fuqishëm me magnitudë 7.3 goditi Vanuatun të martën, duke shkaktuar dëme të konsiderueshme, shkruan A2 CNN. Sipas Shërbimit Gjeologjik të Shteteve të Bashkuara (USGS), tërmeti ndodhi në një thellësi prej 57.1 kilometrash dhe goditi ishullin pak pas mesditës, me kohën lokale. Magnituda fillimisht ishte raportuar më e lartë, por më pas u rishikua në 7.3.
Video të shpërndara në rrjetet sociale, të verifikuara nga CNN, tregojnë se kati i parë i ndërtesës së ambasadës amerikane është dëmtuar pjesërisht, me dritare të thyera dhe mbetje të shpërndara kudo.
Vanuatu, një komb ishullor me rreth 330 000 banorë, përbëhet nga një grup prej 80 ishujsh të shpërndarë në Oqeanin Paqësor. Kryeqyteti Port Vila, me 36 000 banorë, ishte një nga zonat më të prekura nga lëkundjet e forta.
Federata Ndërkombëtare e Kryqit të Kuq dhe Gjysmëhënës së Kuqe njoftoi se vullnetarët e trajnuar ndodhen në terren për të ndihmuar komunitetet e prekura. Katie Greenwood, përfaqësuese rajonale me bazë në Fixhi, deklaroi se janë raportuar dëme të konsiderueshme në kryeqytet.
Sipas USGS, tërmeti shkaktoi një “alert të verdhë” për humbjet ekonomike dhe viktimat, që do të thotë se nevojitet përgjigje në nivel lokal apo rajonal. Humbjet ekonomike janë vlerësuar të jenë mes 1% dhe 10% të PBB-së së Vanuatusë.
Shërbimet qeveritare dhe kontaktet me institucionet publike në Vanuatu u ndërprenë pas tërmetit, ndërsa paralajmërimet për cunami u anuluan. Tërmeti, që preku rëndë 73 000 persona, ka gjasa të kërkojë ndërhyrje të menjëhershme për mbështetje dhe rindërtim. (A2 Televizion)
A2 CNN Livestream
MUND TE LEXONI GJITHASHTU
