Irani ka nisur sulme ndaj Bahreinit dhe Kuvajtit pasi Shtetet e Bashkuara goditën pesë objektiva iraniane, duke përshkallëzuar tensionet dhe duke kërcënuar armëpushimin e brishtë të rënë dakord nga të dyja palët në fillim të këtij muaji, shkruan A2CNN.
Korpusi i Gardës Revolucionare Islamike (IRGC) konfirmoi sulmet të dielën, duke thënë se lëshoi raketa balistike dhe dronë në bazën ajrore amerikane Ali Al Salem në Kuvajt dhe në Flotën e Pestë Detare të SHBA-së në Port Salman në Bahrein.
Bahreini i dënoi sulmet, duke thënë se ato shkelën sovranitetin e tij dhe minuan "mundësitë për depërshkallëzimin dhe stabilitetin në rajon", ndërsa Kuvajti i përshkroi "agresionet e përsëritura të urryera iraniane" si një "shkelje flagrante të sovranitetit të tij".
Ushtria amerikane goditi Sirikun, Bandar-e Lengeh dhe ishullin Qeshm të Iranit të shtunën. Komanda Qendrore e SHBA-së (CENTCOM) tha se forcat e saj detare dhe ajrore "kryen sulme sonte në mbrëmje ndaj 10 objektivave ushtarake iraniane në vende të shumta brenda dhe pranë Ngushticës së Hormuzit", duke thënë se sulmet ishin një përgjigje ndaj një sulmi me dron iranian ndaj tankerit të naftës Kiku. (A2 Televizion)
A2 CNN Livestream
MUND TE LEXONI GJITHASHTU
