Izraeli fut ushtrinë në Liban, SHBA mbështet “vetëmbrojtjen”

Ushtarët e Izraelit shkelën tokën e Libanit me çizmet e tyre. Kështu nisi ajo që shteti hebre e konsideron jo një pushtim, por inkursion me sulme të kufizuara dhe të shënjestruara mirë, të bazuara në inteligjencën e saktë, kundër Hezbollahut, shkruan A2 CNN. Ushtria lëvizi në tokë, ndërsa qielli zbardhej nga drita e raketave të lëshuara në masë. Në terren në Bejrut, shpërthime të forta u raportuan ndërsa sulmet izraelite synonin bastionin e Hezbollahut në periferitë jugore.

Forcat e Mbrojtjes të Tel Avivit kanë paralajmëruar më herët banorët që të evakuojnë tre zona në Bejrutin jugor. Sipas raporteve, një sulm izraelit kishte goditur më parë Ain al-Hilweh - kampi më i madh i refugjatëve në Liban. Ushtria e shtetit hebre pretendon se ka goditur disa zona të prodhimit të armëve dhe infrastrukturën e Hezbollahut në kryeqytet gjatë të hënës, shkruan A2 CNN. Thirrjet ndërkombëtare për një armëpushim kanë vazhduar, me Presidentin amerikan Joe Biden dhe Sekretarin e Jashtëm të Mbretërisë së Bashkuar David Lammy që përsëritën lutjet e tyre për një “zgjidhje politike” për t'i dhënë fund krizës aktuale. “Jam shumë më i shqetësuar se sa mund t’ua marrë mendja. Do të jem i qetë vetëm kur të ndalojnë. Duhet një armëpushim menjëherë”, tha Biden.

Megjithatë qeveria amerikane mbështet fushatën e Izraelit kundër Hezbollahut në Liban. “Operacionet e kufizuara për të shkatërruar infrastrukturën e Hezbollahut që mund të përdoret për të kërcënuar qytetarët izraelitë janë në linjë me të drejtën e Izraelit për të mbrojtur shtetasit e saj”, konfirmon një zëdhënës për sigurinë kombëtare në Shtetet e Bashkuara, duke pranuar se inkursioni është i rrezikshëm.

Në Sirinë fqinje, media shtetërore po raporton se tre persona janë vrarë dhe nëntë të tjerë janë plagosur në sulmet izraelite. Zyrtarët në Liban raportojnë se 1000 njerëz janë vrarë në dy javët e fundit dhe gati një milion tani mund të zhvendosen. Hezbollahu konfirmoi se është gati për një betejë me ushtrinë izraelite dhe se ajo mund të zgjasë për shumë kohë. (A2 Televizion)