Për herë të parë, lufta ka mbërritur dhe në zemër të Bejrutit. Mediat raportojnë se Izraeli zhvilloi një bombardim në qendër të kryeqytetit të Libanit me zhurmën e shpërthimit të dëgjuar në të gjithë qytetin.
Raportohen viktima dhe të lënduar, ndërsa imazhet e para tregojnë dy kate të një pallati banimi plotësisht të shkatërruara.
Fronti Popullor për Çlirimin e Palestinës konfirmoi se 3 udhëheqës të lartë janë vrarë nga sulmet në qendër të Bejrutit. Ndërkohë, Hamasi konfirmon vdekjen e liderit të organizatës në jug të Libanit nga sulmet ajrore izraelite.
Shteti hebre nuk ka komentuar incidentin në Bejrut, por nëse konfirmohen, do të ishin sulmet e para izraelite në zemër të Libanit. Kjo vjen një ditë pasi Tel Avivi zhvilloi sulme në shkallë të gjerë në Jemen, duke shënjestruar ato që i konsideroi “shënjestra ushtarake të regjimit terrorist Houthi”.
Në Liban raportohen mbi 105 njerëz të vrarë vetëm të dielën, me kryeministrin e atij shteti që njofton se deri në 1 milionë njerëz janë zhvendosur tashmë.
Arabia Saudite ka ndërhyrë në lidhje me zhvillimet e fundit duke shprehur shqetësim të madh për një zgjerim të frontit të luftës. “Duhet ruajtur sovraniteti dhe integriteti territorial i Libanit”, është deklarata që vjen nga ministri i jashtëm i Riadit, shkruan A2.
Sakaq, zhvillimet e fundit në Lindjen e Mesme kanë shqetësuar dhe Shtetet e Bashkuara. Sekretari amerikan i mbrojtjes, Lloyd Austin, urdhëroi ushtrinë që të përforcojë praninë në rajon me aftësi mbështetëse të mbrojtjes ajrore dhe ka vendosur forcat në një shkallë gatishmërie të lartë.
Ndërkohë, bomba që Izraeli përdori për të vrarë liderin e Hezbollahut, Hassan Nasrallah, në Bejrut ishte një armë e prodhuar nga Amerika. Këtë e ka zbuluar për NBC, senatori demokrat, Mark Kelly, president i nënkomisionit të aviacionit në Senat. Sipas tij, Izraeli përdori bombën e serisë Mark 84 me një peshë 900 kilogramë. (A2 Televizion)
A2 CNN Livestream
MUND TE LEXONI GJITHASHTU
