Shteti gjerman nuk mund të mobilizojë dot 1 milionë rezervistë në rast lufte. Ky fakt është bërë i ditur nga kreu i organizatës së rezervistëve gjermanë, Patrick Sensberg, në një reagim për Financial Times.
Planet ambicioze të Gjermanisë për të rritur ndjeshëm forcat rezervë të Bundeswehr-it me sa duket po pengohen nga rregulloret e rrepta të mbrojtjes së të dhënave. Problemi prek rreth një milion rezervistë potencialë, përfshirë shumë ish-ushtarë me përvojë në misione jashtë shtetit, shkruan A2.
"Ne i kemi humbur kontaktet e tyre," tha Sensburg. "Është çmenduri. Ne as nuk e dimë nëse janë fizikisht në formë apo nëse duan të shërbejnë përsëri”, citohet të ketë thënë Sensburg.
"Edhe nëse vetëm një e katërta e atij milioni do të kthehej, ne do ta kishim arritur qëllimin tonë”, shtoi ai.
Që nga pezullimi i rekrutimit ushtarak në vitin 2011, nuk ka pasur regjistrim të besueshëm të ish-rekrutëve. Përveç kësaj, në Gjermani ekzistojnë rregullore veçanërisht të rrepta për mbrojtjen e të dhënave, edhe për shkak të përvojave historike nga epoka naziste dhe RDGJ-ja. Sipas Sensburgut, rreth 93 000 njerëz që u dislokuan në Afganistan nuk mund të kontaktohen – një grup që ai e konsideron veçanërisht të vlefshëm për rezervën.
Kancelari Friedrich Merz (CDU) kishte njoftuar se Bundeswehr duhet të bëhet "ushtria konvencionalisht më e fortë në Evropë". Ministri Federal i Mbrojtjes, Boris Pistorius (SPD), deklaroi gjithashtu se Bundeswehr duhet të jetë gati për luftë deri në vitin 2029. Nga kjo pikë e tutje, ekspertët e NATO-s e konsiderojnë të mundur një sulm rus në territorin e aleancës. Qëllimi është, pra, që deri në fund të dekadës të jenë gati 200,000 ushtarë aktivë (aktualisht rreth 180,000) dhe 260,000 rezervistë operacionalë – krahasuar me numrin aktual prej rreth 60,000.
Pistorius dëshiron gjithashtu të mbështetet në “riaktivizimin” e ish-ushtarëve për të arritur rritjen e planifikuar. Përveç kësaj, sipas Qeverisë Federale, një model i ri i shërbimit ushtarak vullnetar pritet të trajnojë 5,000 të rinj në vit. Megjithatë, ky kontribut është larg të qenit i mjaftueshëm për të përmbushur objektivat e personelit.
Prandaj, Shoqata e Rezervistëve luan një rol vendimtar. Ai përfaqëson jo vetëm ish-ushtarët profesionistë dhe rekrutët, por edhe rezervistët civilë. Sipas Sensburgut, ai është përgjegjës për kujdesin e një totali prej dhjetë milionë njerëzish me përvojë ushtarake - nga të cilët rreth nëntë milionë janë mbi 65 vjeç, çka e bën të pamundur rekrutimin e tyre. (A2 Televizion)
A2 CNN Livestream
MUND TE LEXONI GJITHASHTU
