Lufta mes Ukrainës dhe Rusisë mund të përfundojë vetëm me kushtet e Vladimir Putin. Burime ekskluzive për Agjencinë e Lajmeve Reuters bëjnë me dije se kushtet e Presidentit Vladimir Putin për t'i dhënë fund luftës në Ukrainë përfshijnë një kërkesë që liderët perëndimorë të zotohen me shkrim për të ndaluar zgjerimin e NATO-s drejt lindjes dhe për të hequr një pjesë të sanksioneve ndaj Rusisë.
Pasi foli me Trump për më shumë se dy orë javën e kaluar, Putin tha se ai kishte rënë dakord të punonte me Ukrainën për një memorandum që do të përcaktonte konturet e një marrëveshjeje paqeje, duke përfshirë kohën e një armëpushimi, shkruan A2 CNN. Rusia thotë se aktualisht është duke hartuar versionin e saj të memorandumit dhe nuk mund të vlerësojë se sa kohë do të zgjasë. Kievi dhe qeveritë evropiane kanë akuzuar Moskën për ngecje ndërsa trupat e saj përparojnë në Ukrainën lindore.
“Putini është gati të bëjë paqe, por jo me çdo çmim”, tha një burim i lartë rus për Reuters. Tre burimet ruse thanë se Putini dëshiron një premtim "të shkruar" nga fuqitë e mëdha perëndimore për të mos zgjeruar aleancën e NATO-s të udhëhequr nga SHBA drejt lindjes si dhe një përjashtim zyrtar të anëtarësimit të Ukrainës, Gjeorgjisë dhe Moldavisë dhe ish-republika të tjera sovjetike.
Presidenti i SHBA Donald Trump ka thënë vazhdimisht se dëshiron t'i japë fund konfliktit më vdekjeprurës evropian që nga Lufta e Dytë Botërore dhe ka treguar zhgënjim në rritje me Putinin ditët e fundit, duke paralajmëruar të martën se lideri rus po "luan me zjarrin" duke refuzuar të përfshihet në bisedimet e armëpushimit me Kievin, ndërsa forcat e tij shënuan fitime në fushën e betejës.
Rusia gjithashtu dëshiron që Ukraina të jetë neutrale, disa sanksione perëndimore të hiqen, një zgjidhje e çështjes së aseteve të ngrira sovrane ruse në Perëndim dhe mbrojtje për rusishtfolësit në Ukrainë, thanë tre burimet për Reuters. Burimet thanë se, nëse Putin e kupton se nuk është në gjendje të arrijë një marrëveshje paqeje me kushtet e tij, ai do të kërkojë t'u tregojë ukrainasve dhe evropianëve me fitoret ushtarake se “paqja nesër do të jetë edhe më e dhimbshme”.
Kremlini nuk iu përgjigj një kërkese për koment mbi raportimin e Reuters. Putin dhe zyrtarët rusë kanë thënë vazhdimisht se çdo marrëveshje paqeje duhet të adresojë "shkaqet rrënjësore" të konfliktit me Ukrainën. (A2 Televizion)
A2 CNN Livestream
MUND TE LEXONI GJITHASHTU
