Ministrja britanike e Thesarit Tulip Siddiq ka dhënë dorëheqjen nga qeveria, ka njoftuar Downing Street, shkruan A2 CNN.
Sipas mediave të huaja, dorëheqja e saj vjen pasi u shfaqën akuza për pronat e lidhura me tezen e saj, ish-kryeministren e rrëzuar të Bangladeshit, Sheikh Hasina.
Zonja Siddiq iu referua mbikëqyrësit të etikës së kryeministrit pasi u vu nën presion në rritje mbi akuzat për pronat që lidhen me lëvizjen politike të tezes së saj.
Pretendohet se ajo jetonte në prona të lidhura me aleatët e zonjës Hasina, kryeministre e rrëzuar e Bangladeshit.
Zonja Siddiq më parë këmbënguli se nuk kishte "bërë asgjë të keqe", megjithëse udhëheqësja konservatore Kemi Badenoch i bëri thirrje Sir Keir Starmer që ta shkarkonte atë gjatë fundjavës.
Në një letër drejtuar kryeministrit sot, zonja Siddiq tha se ndërsa ajo "nuk kishte shkelur kodin ministror", është e qartë se vazhdimi si ministre e Thesarit do të ishte "një shpërqendrim nga puna e qeverisë".
“Dera mbetet e hapur”, thotë kryeministri britanik, shkruan A2 CNN.
Në përgjigjen e tij, Sir Keir Starmer tha se ai e ka pranuar dorëheqjen e saj "me trishtim" dhe shtoi: "Unë gjithashtu dëshiroj të jem i qartë se Sir Laurie Magnus si Këshilltar i Pavarur më ka siguruar se nuk ka gjetur shkelje të kodit ministror dhe asnjë provë të parregullsie financiare nga ana juaj”.
Ai e lavdëroi atë për marrjen e "vendimit të vështirë" për të dhënë dorëheqjen dhe shtoi se "dera mbetet e hapur për ju" në vijim.
Downing Street ka njoftuar se deputetja e Wycombe Emma Reynolds është emëruar për ta zëvendësuar atë në Thesar dhe Torsten Bell do të marrë rolin e saj të mëparshëm në Departamentin për Punë dhe Pensione.
(A2 Televizion)
A2 CNN Livestream
MUND TE LEXONI GJITHASHTU
