Aleanca ushtarake NATO ka deklaruar se nuk ekziston asnjë mekanizëm ligjor për pezullimin apo përjashtimin e vendeve anëtare, pas raportimeve se Shtetet e Bashkuara të Amerikës mund të kenë shqyrtuar masa ndaj Spanjës për qëndrimin e saj në lidhje me konfliktin me Iranin.
Sipas një raporti të Reuters, një email i brendshëm i Pentagonit ka sugjeruar mundësinë e ndëshkimit të aleatëve që, sipas SHBA-së, nuk kanë mbështetur mjaftueshëm fushatën e saj. Megjithatë, një zyrtar i NATO-s i tha BBC-së se traktati themelues i aleancës “nuk parashikon asnjë dispozitë për pezullim apo përjashtim”.
Kryeministri i Spanjës, Pedro Sánchez, i hodhi poshtë këto raportime, duke theksuar se vendi i tij vepron mbi baza zyrtare dhe në përputhje me të drejtën ndërkombëtare. Spanja ka refuzuar përdorimin e bazave të saj ajrore për sulme ndaj Iranit, pavarësisht pranisë së bazave ushtarake amerikane në territorin e saj.
Nga ana tjetër, administrata amerikane ka shtuar kritikat ndaj aleatëve evropianë. Presidenti Donald Trump ka deklaruar më herët se aleanca e NATO-s është shpesh “një rrugë me një kah”, duke akuzuar partnerët për mungesë angazhimi.
Tensionet lidhen edhe me zhvillimet në Lindjen e Mesme, ku SHBA dhe Izraeli kanë ndërmarrë sulme ndaj Iranit, ndërsa ky i fundit ka kufizuar qarkullimin në Ngushticën e Hormuzit – një rrugë kyçe për transportin global të naftës.
Pavarësisht debateve, zyrtarë evropianë kanë theksuar se anëtarësimi i Spanjës në NATO nuk vihet në dyshim, ndërsa thirrjet për unitet brenda aleancës mbeten të forta. (A2 Televizion)
A2 CNN Livestream
MUND TE LEXONI GJITHASHTU
