Një tjetër incident fatal ka ndodhur pranë një qendre shpërndarjeje në jug të Gazës. Ushtria izraelite thotë se ka qëlluar pranë një kompleksi shpërndarjeje ndihmash pasi ka identifikuar "disa të dyshuar" dhe po shqyrton raportet për viktima. Ministria e shëndetësisë e drejtuar nga Hamasi thotë se trupat izraelite vranë 24 persona që po prisnin ndihma pranë një vendi shpërndarjeje në Rafah. Agjencia e mbrojtjes civile e drejtuar nga Hamasi thotë se forcat izraelite hapën zjarr me tanke dhe dronë ndaj mijëra palestinezëve që prisnin të merrnin akses në qendrën e ndihmës.
Zëdhënësi i Agjencisë së Mbrojtjes Civile, Mahmoud Bassal, më tha se shumica e të vrarëve dhe të plagosurve në qendrën e shpërndarjes së ndihmave në Rafah u goditën nga të shtënat me armë zjarri nga tanket, helikopterët dhe dronët kuadrokopterë.
Ushtria izraelite ka publikuar një deklaratë duke thënë se trupat e saj qëlluan pasi identifikuan "të dyshuarit" rreth 0.5 km nga një vend shpërndarjeje ndihmash. Thuhet se forcat e saj fillimisht hapën një “zjarr paralajmërues”, duke shtuar se “pasi të dyshuarit nuk arritën të tërhiqeshin, të shtëna të tjera u drejtuan pranë disa të dyshuarve individualë që përparuan drejt trupave”. Forcat Mbrojtëse të Izraelit (IDF) thonë se janë në dijeni të raporteve për viktima dhe "detajet e incidentit po shqyrtohen".
Ndërkohë, ushtria izraelite ka bërë të ditur se tre ushtarë të saj janë vrarë në Rripin e Gazës, në atë që besohet të jetë sulmi më serioz ndaj forcave të saj që kur Izraeli i dha fund armëpushimit me Hamasin në mars. Ushtarët thuhet se u goditën gjatë një përleshjeje në Gazën veriore. Nuk ka detaje të mëtejshme në dispozicion në këtë kohë. Mediat lokale raportuan për një shpërthim. (A2 Televizion)
A2 CNN Livestream
MUND TE LEXONI GJITHASHTU
