Irani ka paralajmëruar se është i gatshëm të mbyllë plotësisht Ngushtica e Hormuzit nëse Shtetet e Bashkuara të Amerikës ndërmarrin sulme ndaj termocentraleve të tij.
Shtabi i Forcave të Armatosura iraniane deklaroi se ky veprim do të ishte një përgjigje direkte ndaj çdo bombardimi të infrastrukturës energjetike të vendit. Sipas raportimit të CNN, ky është paralajmërimi më i fundit nga Teherani në kuadër të tensioneve në rritje.
Nga ana tjetër, presidenti amerikan Donald Trump ka deklaruar se do të urdhërojë sulme ndaj objekteve energjetike iraniane nëse Ngushtica e Hormuzit nuk hapet plotësisht për lundrimin e anijeve brenda 48 orëve.
Në reagimin e saj, ushtria iraniane theksoi se në rast se këto kërcënime realizohen, ngushtica do të mbyllet për një kohë të pacaktuar dhe nuk do të rihapet derisa të rindërtohen termocentralet e dëmtuara.
Gjithashtu, Irani paralajmëroi se mund të synojë infrastrukturën energjetike dhe të komunikimit të Izraeli, si dhe kompani në rajon me aksionarë amerikanë. Sipas deklaratës, edhe termocentralet në vendet që strehojnë baza amerikane mund të konsiderohen objektiva legjitime.
Më herët, kryetari i Parlamentit iranian, Mohammad Baqer Qalibaf, kishte deklaruar se nëse objektet energjetike të Iranit sulmohen, infrastruktura kritike në Lindjen e Mesme mund të përballet me “shkatërrim të pakthyeshëm”. (A2 Televizion)
A2 CNN Livestream
MUND TE LEXONI GJITHASHTU
