“Putin mund ta fitojë luftën”, SHBA: Armatimet po mbarojnë, Kongresi të zhbllokojë ndihmat

Nëse Kongresi Amerikan nuk i miraton shpejt fondet për Ukrainën, Vladmir Putin mund ta fitojë luftën në Ukrainë. Paralajmërimi i fortë vjen nga Shtëpia e Bardhë. Në një letër dërguar kreut të Dhomës së Përfaqësuesve, Mike Johnson shefja e zyrës për buxhet, në Shtëpinë e Bardhë Shalanda Young, thekson se nëse ndihma ushtarake përfundon, atëherë Kievi do të gjunjëzohet ndaj pushtimit rus.

Presidenti amerikan, Joe Biden, i ka kërkuar Kongresit në tetor që të miratojë një pako ndihme në vlerë të 106 miliardë dollarëve për Ukrainën dhe Izraelin, mirëpo ligjvënësit janë të ndarë. Këshilltari amerikan për Siguri Kombëtare, Jake Sullivan, ka shkuar përtej, duke sugjeruar që vota kundër ofrimit të ndihmës për Ukrainën, është në fakt votë për t’ia lehtësuar fitoren Rusisë.

“Kongresi duhet të vendosë nëse do të vazhdojë lufta për lirinë e Ukrainës… ose nëse Kongresi do t’i injorojë mësimet nga historia dhe ta lejojmë fitoren e Putinit. Është aq e thjeshtë”.

Shtetet e Bashkuara kanë ndarë 111 miliardë dollarë për Ukrainën që prej nisjes së luftës në shkurt të vitit 2022, përfshirë 67 miliardë dollarë për blerje të pajisjeve ushtarake.

Volodimir Zelensky pritet t’i drejtohet senatorëve amerikanë me një videomesazh, në përpjekjet për të shtyrë aprovimin e paketës së re. Shqetësimet për shterim të mbështetjes financiare vijnë teksa Zelensky përballet me pakënaqësi në rritje edhe në shtëpinë e tij.

Në kritika të paprecedenta, kryeashkiaku i Kievit Vitali Klitçko tha se presidenti po bëhej gjithnjë e më autokrat dhe se po gënjente mbi ecurinë e luftës e cila sipas tij ka ngecur.   (A2 Televizion)