Rebelët sirianë rrëzojnë statujën e vëllait të Bashar al-Assad në Aleppo

Pasi rihynë pas 8 vitesh duke shtënë në dorë Aleppo-n, rebelët islamistë që janë kundër qeverisë së Presidentit sirian Bashar al-Assad, kanë rrëzuar një statujë të vëllait të tij, Bassel al-Assad, të vendosur në qendër të qytetit.

Videoja e postuar në rrjetin social "X" tregon rebelët që tërheqin statujën e Bassel al-Assad, i cili ka vdekur në një aksident automobilistik në vitin 1994. Ata e shtrinë statujën në tokë, ndërsa rebelët brohorasin dhe gjuajnë me armë në ajër për të shprehur gëzimin për këtë akt.

Ngjarja ka pasuar një ofensivë të papritur të rebelëve, të cilët u angazhuan në luftime të ashpra në qytet, me makina të blinduara dhe kamionë të mbushur me luftëtarë të armatosur, që shfrytëzuan mungesën e një reagimi të shpejtë nga ushtria siriane.

Sulmi ka lënë të shokuar regjimin e Damaskut, pasi rebelët kanë hyrë në qytetin e dytë më të madh të Sirisë, duke sfiduar forcat qeveritare dhe duke shkaktuar një përmbysje të madhe për autoritetet.

Rebelët, të cilët janë përfaqësues të një grupi të shtrirë të opozitës islamiste, kanë pushtuar disa pika kyçe të qytetit, duke përfshirë Kështjellën e Vjetër të Aleppos dhe selinë e policisë.

Ata janë filmuar teksa shkatërrojnë posterat e Presidentit Bashar al-Assad dhe shkelmojnë e djegin disa prej tyre.

Pas këtij sulmi, Rusia, një aleate e fuqishme e regjimit sirian, është kundërpërgjigjur me sulme ajrore në qytet për herë të parë që nga 2016, duke synuar goditjen e aktivitetit rebel në zonë.

Ky veprim shërben për të ndihmuar forcat qeveritare që të stabilizojnë situatën dhe të nisin një kundërsulm për të rikthyer kontrollin mbi qytetin. Kjo ngjarje ka një rëndësi të veçantë, pasi Aleppo ka qenë një nga qytetet kyçe të Sirisë dhe një simbol i luftës civile që shpërtheu pas protestave të vitit 2011 kundër regjimit të Bashar al-Assad.

Pas një beteje brutale në vitin 2016, regjimi sirian, me ndihmën e forcave ruse dhe iraniane, mori kontrollin e plotë të qytetit, duke i dhënë një kthesë të rëndësishme luftës. Aleppo ka qenë e qetë deri tani, dhe ky sulm ka treguar se rebelët janë ende të aftë të ndikojnë në dinamikat e luftës, duke sfiduar regjimin e Assadit dhe duke krijuar një presion të ri në këtë fazë të luftës. (A2 Televizion)