Sekretari amerikan i Mbrojtjes, Pete Hegseth, deklaroi se Shtetet e Bashkuara do të vazhdojnë bllokadën detare ndaj Iranit për një periudhë të pacaktuar, duke theksuar se presioni ushtarak ndaj Teheranit do të mbetet i lartë.
Gjatë një deklarate për mediat në Uashington, ai u shpreh se SHBA ka epërsi të konsiderueshme dhe se Irani nuk është në gjendje të rindërtojë kapacitetet e tij ushtarake pas disa javësh konflikti. Sipas tij, megjithëse Teherani mund të zhvendosë asetet ekzistuese, nuk ka mundësi reale për t’i zëvendësuar ato.
“Mund të zhvendosni gjërat, por nuk mund t’i rindërtoni ato në të vërtetë,” tha Hegseth, duke iu drejtuar drejtpërdrejt udhëheqësve iranianë dhe duke shtuar se ata nuk kanë më një industri funksionale mbrojtjeje.
Ai pretendoi gjithashtu se marina amerikane po kontrollon trafikun në Ngushticën e Hormuzit, ndërsa paralajmëroi për pasoja të mëtejshme ndaj infrastrukturës iraniane.
“Ndërsa ekspozoheni përmes lëvizjeve tuaja nën vëzhgimin tonë të vazhdueshëm, ne jemi gati dhe të armatosur kundër infrastrukturës suaj kritike me përdorim të dyfishtë, ndaj kapaciteteve tuaja të mbetura të prodhimit të energjisë dhe industrisë suaj energjetike,” deklaroi ai.
Në fund, Hegseth u shpreh se lufta “nuk është një përballje e barabartë”, duke nënvizuar epërsinë ushtarake të SHBA-së.
Deklaratat e tij vijnë në një moment tensionesh të larta, ndërsa përpjekjet diplomatike për zgjatjen e armëpushimit dhe rifillimin e negociatave mes palëve vijojnë. (A2 Televizion)
A2 CNN Livestream
MUND TE LEXONI GJITHASHTU
