Shkëmbimi i zjarrit Izrael- Liban, palët thonë se nuk duan luftë, por janë gati

Nga A2 CNN
25 Gusht 2024, 17:45 | Bota

Ushtria izraelite nisi ato që i quajti sulme parandaluese kundër objektivave të Hezbollahut në Liban, pasi identifikoi se grupi militant po përgatitej të lëshonte raketa në drejtim të territorit izraelit. Menjëherë pas fillimit të këtij operacioni ushtarak, Hezbollahu tha se nisi sulme ndaj Izraelit si hakmarrje për vrasjen e një komandanti të lartë ushtarak muajin e kaluar.

Grupi i mbështetur nga Irani pretendoi se "faza e parë" e përgjigjes së tij ndaj Izraelit ka përfunduar me "sukses të plotë". Rreth 200 raketa u lëshuan nga Libani drejt Izraelit, tha ushtria izraelite.

Hezbollahu tha se kjo fazë u përqendrua në shënjestrimin e vendeve ushtarake izraelite që do ta pengonin atë nga kapja e një breshërie të dytë sulmesh me dronë që synon "një objektiv të dëshiruar thellë brenda entitetit", pa specifikuar se cili është ai objektiv.

Kryeministri izraelit Benjamin Netanyahu ka folur në fillim të një takimi urgjent të kabinetit të sigurisë kombëtare në Tel Aviv. Ai tha se ushtria izraelite kishte vepruar "në mënyrë proaktive për të larguar kërcënimin" pasi zbuloi përgatitjet e Hezbollahut për të sulmuar Izraelin. Netanjahu shprehu vendosmërinë për të mbrojtur vendin e tij, siç u shpreh, “për t'i kthyer banorët e veriut të sigurt në shtëpitë e tyre”. “Kushdo që na lëndon - ne i lëndojmë ata," tha ai.

Ndërsa zëdhënësi i ushtrisë izraelite, Daniel Hagari tha se shumica e sulmeve kundër Hezbollahut janë aktualisht në Libanin jugor, por shtoi se Izraeli "do të sulmojë kudo.. në Liban ku ekziston një kërcënim për shtetin e Izraelit".

Gjasat për një përshkallëzim midis dy palëve ishin rritur që kur një sulm me raketa në Golan të pushtuar nga Izraeli muajin e kaluar vrau 12 persona, shumica fëmijë, dhe ushtria izraelite vrau një komandant të lartë të Hezbollahut në Bejrut si përgjigje. Frika është rritur për një përshkallëzim të madh potencial të luftimeve në Lindjen e Mesme që mund ta çojë rajonin në konflikt të gjithanshëm.

  (A2 Televizion)

A2 CNN Livestream

Latest Videos