Në fillim shpërthimi, më pas flakët dhe vdekja… 33 persona janë vrarë nga Rusia në Ukrainë që lëshoi bomba rrëshqitëse ndaj dy autobusëve plot me civilë në qytetin Kramatorsk në frontin e luftës.
Bilanci raportohet nga ekipet e shpëtimit që shkuan menjëherë në vendngjarje, ndërsa 18 persona të tjerë janë plagosur. Shefi rajonal i Donjeckut akuzon Rusinë se ka shënjestruar me qëllim autobusët për të vrarë sa më shumë civilë. Imazhet e shpërndara në rrjete sociale tregojnë makabritetin e një lufte që ka humbur kufijtë moralë, ndërsa shfaqen autobusët duke u djegur dhe viktimat në rrugë, shkruan A2.
“Ky sulm nuk do të kalojë pa kundërpërgjigje. Rusia po përpiqet të shkatërrojë të gjithë jetën në rajonin e Donbasit dhe bota duhet të reagojë për këtë. Duhet kundërpërgjigje vendimtare, në mënyrën që Rusia meriton për të gjitha vdekjet që ka shkaktuar”, u shpreh presidenti Volodymyr Zelensky, duke shprehur ngushëllimet e tij për familjarët e viktimave.
Kramatorsku, një qytet fqinj me Slovianskun, janë pjesë e të ashtëquajturit brez i fortesës që Rusia po përpiqet të pushtojë si pjesë e pretendimit të Vladimir Putinit për të gjithë rajonin industrial të Ukrainës në Donbas. Moska ka bombarduar edhe Kievin, ku raportohen të paktën 3 viktima dhe 13 të plagosur. Një ditë më parë në mbarë Ukrainën u shënuan orë ferri.
Por, lufta ka prekur edhe vendin që e nisi atë. Dronët ukrainas kanë goditur një qendër të dhënash në pronësi të gjigantit rus të teknologjisë Yandex. Ky është sulmi i parë i raportuar i këtij lloji. Një zjarr shpërtheu menjëherë në atë zonë. Yandex, i njohur me nofkën “Google i Rusisë”, është motori kryesor i kërkimit në gjuhën ruse dhe përdoret gjerësisht në Federatë për shërbime të tilla si taksitë dhe dërgesat. Ai gjithashtu dominon hapësirën në gjuhën ruse. (A2 Televizion)
A2 CNN Livestream
MUND TE LEXONI GJITHASHTU
