Donald Trump dhuron spektakël gjatë fushatës. Si një “showman” i vërtetë, republikani shfrytëzoi hapin fals të Joe Biden me deklaratën e tij që “mbështetësit e Trump janë plehra” duke u përjetësuar në kabinën e një kamioni mbeturinash me sloganin e tij të fushatës në një aeroport në Wisconsin. Ai hoqi xhaketën për të veshur jelekun e punonjësve të shërbimit të pastrimit, ndërsa iu përgjigj pyetjeve të gazetarëve.
“250 milionë njerëz nuk janë plehra. Mund të ju tregoj se kush janë mbeturinat e vërteta, por ne nuk do ta bëjmë këtë”, tha Trump.
Polemika filloi gjatë fundjavës kur një komedian në tubimin e Trumpit në Nju-Jork e quajti Porto Rikon “një ishull plehrash”, duke e vënë fushatën republikane në një pozitë të vështirë. Megjithatë, gafa e Biden-it më pas i dha ish-presidentit një mundësi për të luajtur viktimën, pavarësisht se Shtëpia e Bardhë sqaroi se presidenti nuk po synonte që të ofendonte miliona amerikanë. Në këtë atmosferë të ndezur, ku kanë mbetur vetëm pak ditë nga 5 nëntori i zgjedhjeve presidenciale, Kamala Harris dhe Donald Trump mbajtën tubime elektorale në shtetin kyç të Winsconsin, me sondazhet që tregojnë një garë tepër të ngushtë.
“Dëshiroj që ta nis fjalimin tim duke thënë se 250 milionë amerikanë nuk janë plehra. Këtë javë, Kamala ka krahasuar kundërshtarët e saj politik me vrasësit masivë më të këqinj në histori. Kamala dhe Joe Biden na quajtën ne, madje edhe mbështetësit e tyre, plehra. Mund të ju them se jeni zemra dhe shpirti i Amerikës. Ju e keni ndërtuar këtë vend. 9 vitet e kaluara, Kamala dhe partia e saj na kanë quajtur racistë, fanatikë, fashistë, të mjerueshëm, të pandreqshëm, nazistë. Dhe më quajtën Hitler. Ata ju ngacmuan, na kanë demonizuar”, tha Trump.
Në anën tjetër, demokratja Harris u përqëndrua në thirrjen për qytetarët të votojnë dhe në sulmet ndaj rivalit. “Ne e dimë se kush është Donald Trump. Nuk është diskush që mendon se si ta bëjë jetën tuaj më të mirë. Është një person i paqëndrueshëm, i obsesionuar me hakmarrje, i konsumuar me ankesa dhe po kërkon pushtet të pakontrolluar. Nëse zgjidhet, gjë e cila nuk do të ndodhë, ai do të hyjë në Shtëpinë e Bardhë me një listë me armiq”, tha Harris.
Sipas sondazheve të fundit, mes Harris dhe Trump ka një baraspeshë, por në shtetet kyçe, republikani ka një epërsi të lehtë në pjesën më të madhe prej tyre. (A2 Televizion)
A2 CNN Livestream
MUND TE LEXONI GJITHASHTU
